An Chúirt Filíochta - Oireachtas na Samhna 2021

Mar a tharla anuraidh, beidh An Chúirt Filíochta á seoladh go fíorúil i mbliana. Tá barántas na bliana seo (féach thíos) seolta ag an Sirriamh Gníomhach uasal, Proinsias Mac a'Bhaird, agus beidh mé féin agus Bríd Ní Mhóráin ag coinneáil súil ghéar air, ar fhaitíos go bhfágfaidh sé muide aon rud ar lár. 

Arís i mbliana, is físeáin atá uainn, a chairde, le go mbeidh An Chúirt Filíochta páirteach mar chuid d'Oireachtas fíorúil na Samhna seo. 29 file a ghlac páirt ann anuraidh, agus is féidir an físeán álainn sin, a chuir Proinsias le chéile, a fheiceáil anseo. 

Tá an Treoir Taifeadta ag bun na blagmhíre seo (féach thíos), agus is féidir bhur n-iarrachtaí a thaifead, agus an físeán a sheoladh, mar aon le téacs an dáin, chuig Proinsias ag pmacabhaird ag gmail ponc com, ar ríomhphost, ar WeTransfer, nó chuig WhatsApp uimhir (086)2318698. 

Iarrtar oraibh focail an dáin a sheoladh, a chairde, mar cuirfidh Proinsias fotheideal le do dhán, le go mbeidh an lucht féachana in ann focail an dáin a léamh agus a chloisteáil uait, ag an am céanna. 

Tá agaibh go dtí Luan, 4 Deireadh Fómhair - beidh obair theicniúil le déanamh ag Proinsias in am don seoladh fíorúil, agus is fearr na físeáin a bheith aige faoin dáta sin, mura miste libh. Dán amháin (nó dhá dhán ghairide) atá ag teastáil, ach gan dul thar 3 nóiméad ar an bhfíseán, le bhur dtoil.

Táimid buíoch de lucht Oireachtas na Samhna as an deis a thabhairt dúinn bheith páirteach san Oireachtas fíorúil, arís i mbliana - tá ardán domhanda á chur ar fáil acu le go mbeidh deis ag filí na tíre seo filíocht na Gaeilge a cheiliúradh arís.

Seo chugaibh Barántas na bliana seo,

                                                                 Barántas

Do Bhaird, Filí agus Ollaimh Bhanbha, beannachtaí!

Whereas, tá sé de nós ársa ag éigse Éireann, olagón géar a dhéanamh faoi dhroch-chás Inis Eagla [sic], bhí sé de chlú aici riamh anall, in am an ghátair, port níos dóchasaí a sheinnt do phatrún fial.

Be it known, go bhfuil an ghrian ag éirí an athuair ar chlár na nGael, dóchas faichilleach le brath i measc maca Mhíle go bhfuil an phlá réabtha ag dul in éag. Caoineofar a bhfuil ar lár ach breathnófar chun cinn le súile úra. Ach an mairfidh ár ndóchas i bhfad nó an mbáfar é faoi thonn iombháite? Cén dóchas atá acu siúd ar cás leo aer agus farraigí an domhain nó a bhfuil cúram acu dár ndeirfiúracha i mbrá sna críocha thoir?

Whereas, tá saol úr le cruthú againn nó, ar a laghad, seansaol le hathshamhlú againn, cén treoir, spreagadh agus misneach a thabharfaidh filí Fódhla do na cluasa a éistfear leo?

Ordaítear duit mar sin, subpoena ad testificum, fianaise a thabhairt do Chúirt a eagrófar tráth na Samhna, le solas a chaitheamh ar an todhchaí, ar an timpeallacht agus ar ghrúpaí Taliban sa bhaile is i gcéin.  

Tugtha faoi mo lámhsa [le húdarás incheistithe] ar an lá seo, an tríú lá dhéag de mhí Mheán Fómhair, Bliain ár dTiarna Dhá Mhíle Fiche is a hAon.         

 

                                                     PROINSIAS MAC A’ BHAIRD

                                                                         Sirriam gníomhach

 God Save The King!

 *****************

 TREOIR TAIFEADTA d’FHÍSEÁN OIREACHTAS NA SAMHNA 2021

Aimsigh do Shuíomh Taifeadta:

Bí airdeallach maidir leis an spás agus leis an gcúlra a roghnóidh tú mar gur ionann an fhíseán a thaispeáint go poiblí agus cuireadh a thabhairt d’aíonna isteach sa spás sin;

Cinntigh go mbeidh tú ar do chompord agus go mbeidh gach ní a bheidh ag teastáil uait in aice láimhe agat sula dtosóidh tú;

Déan tástáil roimh ré lena chinntiú go bhfuil dóthain solais sa spás le go mbeidh tú le feiceáil go soiléir.

An Suíomh Taifeadta:

Déan cinnte go bhfuil tú i seomra ciúin in áit nach mbeidh:

 Fothram ar bith;

 Macalla ar bith; ná

 Aon innill leictreonacha ar siúl sa chúlra. 

Fearas atá molta:

 Fón Póca nó Ipad le ceamara ar ardchaighdeán;

 Seastán tríchosach beag (mura bhfuil an trealamh seo agat, socraigh suas an fón póca nó

an ipad ar dhromchla mín, cothrom, os do chomhair amach agus daingnigh ansin é ionas

nach mbeidh aon bhaol go dtitfidh sé nó go mbeidh sé ag luascadh.)

An Taifead:

 Ar do cheamara, roghnaigh an socrú le haghaidh íomhá tírdhreacha (ar mhóramh na bhfearas níl le déanamh ach an fearas féin a iompú ar a thaobh;

 Socraigh tú féin os comhair an cheamara ionas go mbeidh tú le feiceáil ó do bhásta aníos go barr do chloiginn, ach fág neart spáis thar timpeall ort féin;

 Bí chomh nádúrtha agus is féidir leat ach b’fhearr gan an iomarca útamála ná bogadh thart a dhéanamh le linn an taifeadta.

 Bíodh do script réidh agat!

Nuair a bheidh an fhíseán críochnaithe agat:

 Sábháil an fhíseán; agus

 Seol é chuig an duine cuí ar WhatsApp, Ríomhphost nó WeTransfer.

Beidh Louise Ní Dháibhéid (louise@antoireachtas.ie) ar fáil le comhairle a chur ort má bhíonn aon cheist agat.

An Chúirt Filíochta - Oireachtas na Samhna 2025

Tá ár n-ócáid bhliantúil, An Chúirt Filíochta, ar ais linn arís agus, an geábh seo, beidh muid uilig ag tabhairt ár n-aghaidh agus ár ndánta i dtreo Bhéal Feirste, áit a mbeidh Oireachtas na Samhna ar siúl idir 29 Deireadh Fómhair agus 2 Samhain.

Is ar an Satharn, 1 Samhain, ag 2:00in, i gCultúrlann McAdam Ó Fiaich a bheas muid uilig ag bailiú le chéile le réabadh a dhéanamh aithris a dhéanamh ar na dánta a bheas cumtha againn don Chúirt.  

Mar is iondúil, beidh mé fhéin agus Bríd Ní Mhóráin ag crochadh thart, mar mhná tí, le súil a choinneáil ar Phroinsias dháileadh an Cognac, caviar agus cócaoin, agus, más gá, triail a bhaint astu roimh ré, ar mhaithe libhse, a chumadóirí; le bheith cinnte go bhfuil siad ar ardchaighdeán, an dtuigeann sibh.  

Beidh obair theicniúil le déanamh ag Proinsias Mac a'Bhaird, sirriam gníomhach agus eagraí na Cúirte, in am don ócáid, mar sin bheadh sé thar a bheith buíoch ach bhur gcuid dánta a fháil roimh an Déardaoin, 30 Deireadh Fómhair, chuig pmacabhaird ag gmail ponc com, sé sin, más mian leat do dhán/dhánta a bheith le feiceáil ar an scáileán agus tú i mbun aithrise. 

Ní gá cloí le téama nó téamaí an bharántais, ach iarrtar ort gan ach dán amháin nó dhá dhán ghairide a thabhairt leat, mar d'fhéadfadh cuid den lucht éisteachta titim ina gcodladh bheith ag dul chuig ócáid eile, agus beidh orainn cloí leis an am atá leagtha síos don Chúirt Filíochta ag lucht eagraithe an Oireachtais. Bíonn siad sách cantalach cúramach faoi chúrsaí ama, mar a thuigfeá, agus caithfidh muid a bheith cinnte go mbeidh am againn dul ar ragairne do na sólaistí, ag deireadh na Cúirte. Ár mbuíochas le Clár na Leabhar Gaeilge/Foras na Gaeilge as a gcuid urraíochta fialmhaire. 

Is ócáid shóisialta atá i gceist leis an gCúirt Filíochta, agus beidh fáilte roimh lucht éisteachta chomh maith le lucht aithrise. Cuirtear fáilte ar leith roimh fhilí nua, is cuma cén aois iad. Tá muid thar a bheith buíoch d'fhoireann an Oireachtais as a gcuid tacaíochta. Cuidíonn siad linn, chuile bhliain, croí na filíochta a choinneáil ag bualadh. 

Iarrtar oraibh, le bhur dtoil, Deasghnátha na Cúirte a léamh go cúramach, ar fhaitíos go mbeadh gá le breab aon cheist agaibh do na hoifigigh, roimh an gCúirt. 

Barántas

Do Bhaird, Filí agus Ollaimh Bhanbha, beannachtaí!

Whereas, ós tearc an éisteacht a thugtar don éigse, tá an domhan thoir agus an domhan thiar ar shiúl chun sioparnaí. Cuireann fáithe fealltacha cogair chalaoise i gcluas agus is minice bréag agus bladar á chluinstin ag pobal fulangach. Thairis sin, tugtar ár n-ógánaigh a thugann dúshlán ceoil ar ghéarleanúint agus cinedhíothú os comhair bhreithimh na nGall lena nglórthaí a chur ar ceal.

Be it known, tá maorgacht ár mbratacha á chlaonadh, tá síocháin ár ndaoine á réabadh agus go bhfuiltear ag iarraidh beag a dhéanamh dár n-amhráin agus dár n achainíocha.

Whereas, tá ceithre chuid de Chúig Achadh Uisnigh ag roghnú ceann urra úr a labhrós ar a son. Cén dán molta a chumfaidh Éigse Éireann dár n-uachtarán nua agus cén chomhairle a chuirfear uirthi agus í ag iarraidh Críocha Fáil a mhuirniú agus threorú le go mbeidh dóchas agus rath ar a chlann?

Ordaítear duit, subpoena ad testificum, fianaise a thabhairt os comhair Cúirte a eagrófar ar an tSatharn, an chéad lá de mhí na Samhna i mBéal Feirste cois cuain ag 2.00 pm, maidir le bratacha, brúidiúlacht agus bearta dóchais.

Tugtha faoi mo lámhsa [le húdarás incheistithe] ar an lá seo, an dara lá dhéag de Dheireadh Fómhair, Bliain ár dTiarna Dhá Mhíle Fiche a Cúig.

                                                            PROINSIAS MAC A’ BHAIRD
                                                                               Sirriam (mall)ghníomhach

God Save The King!

Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá chuid féin a aithris ach iarrtar ar gach finné a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige. Ní nós bualadh bos a thabhairt agus an finné i lár aithrise [ach amháin sa chás go maslaítear lucht uabhair ar bhealach nuálach turgnamhach].

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar LGFA Dhún na nGall, tacsaithe Bhéal Feirste ná Jim Gavin ina thubaiste phearsanta nó náisiúnta.

Bronnfar dram uisce beatha, crág duilisc agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard.

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig, Gaelg, Gaelscoilis, Cant, agus Gaelic Bhóthar na bhFál.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh sé de chead ag an ghiúiré a gcuid seanfháinní óir a chaitheamh ar an fhinné.

Taispeántar an meas is dual d’oifigigh na Cúirte agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith nó i ndiaidh imeachtaí na Cúirte agus ní fhéachfar air sin mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a chuid fianaise a chanadh, ach ní mór glór ceolmhar binn a bheith aige. Seachnaítear na mionghléasanna agus an Hip Hop.

Ceadaítear don ghiúiré tuilleadh rialacha a chur leis an liosta seo agus nósanna nua a bhunú gan choinne.

An Chúirt Filíochta - Oireachtas na Samhna 2017

Mar a fheicfidh sibh anseo, bíonn an An Chúirt Filíochta beo beathach ag Oireachtas na Samhna chuile bhliain, mar a bhí anuraidh.

Beidh an Chúirt ar bun arís i mbliana, ar ndóigh, ag Oireachtas na Samhna 2018, (dréacht plean d'imeachtaí na féile anseo, agus aip an Oireachtais le fáil anseo) ach beidh tuilleadh uaim faoi sin, ar ball, nuair a gheobhaidh mé Barántas na bliana seo ó Shirriam Gníomhach na Cúirte é féin, Proinsias Mac a'Bhaird.

Bhí an-tráthnóna againn anuraidh, mar is iondúil, agus bhí na filí agus a gcuid dánta thar barr. Go minic, bíonn scéal beag le hinsint ag an bhfile, roimh ré, faoin dán atá sé/sí ar tí a léamh, agus bíonn na scéalta sin iad féin mar chuid lárnach, spéisiúil agus speisialta, den Chúirt. 

Tá an Chúirt ag dul ó neart go neart, chuile bhliain, idir fhilí agus lucht éisteachta ag cur go mór leis an ócáid. A bhuí le hurraíocht ó Fhoras na Gaeilge, bhí deis againn greim bia agus deoch a bheith againn le chéile, tar éis na Cúirte, rud a thug deis dúinn uilig bualadh le chéile, gan strus ná stró ar aon duine, ach comhrá agus craic mar chlabhsúr againn ar thráthnóna pléisiúrtha. 

Seo iad na filí a bhí ann anuraidh, ag Cúirt Filíochta 2017, san ord reatha inar léigh siad a gcuid dánta,

An Sirriam Gníomhach, Proinsias Mac a'Bhaird

Róisín Sheehy

Concubhar Ó Liatháin

Alan Titley

Máirín Mhic Lochlainn

Mícheál Ó hUanacháin

Máire hOibicín Uí Eidhin

Pádraig Mac Fhearghusa 

 Stiofán Ó Briain

Áine Durkin

Seán Ó Muireagáin

Bríd Ní Mhóráin

Áine Ní Éalaí

Mícheál Ó Ruairc

Máire Burns

 Betsy Ní Shuibhne    

Sionann Ní Ghréacháin

Matt Ó Maonaigh

Mo bhuíochas ó chroí le Proinsias Mac a'Bhaird, le foireann an Oireachtais, agus le hurraitheoirí na hócáide, Foras na Gaeilge. 

Bhí an-time againn.

Táim ag súil go mór le sibh a fheiceáil ag an gcéad Chúirt Filíochta eile, 3 Samhain, ag Oireachtas na Samhna i gCiarraí.

Oireachtas na Samhna 2013 - An Chúirt Filíochta

Mar is eol daoibh, a léitheoirí, ón méid a scríobh mé cheana, is ócáid bhliantúil í Cúirt Filíochta an Oireachtais anois, agus, mar a fheicfidh sibh ón ngrianghraf thuas, bhí scaifte maith d'fhilí na tíre páirteach i mbliana. Ó chlé, 

Mise, Seán Ó Muireagáin, Concubhar Ó Liatháin, Airt Ó Maolfeabhail, Marcas MacConghail, Ailbhe Ní Ghearbhuigh, Mícheál Ó Ruairc, Máire Burns, Stiofán Ó Direáin, Betsy Ní Shuibhne, Pádraig MacFhearghusa, Bríd Ní Mhoráin, Paddy Bushe, Proinsias Mac a'Bhaird agus Pádraig Ó Laighin. 

Cé gur aithris Joe Steve Ó Neachtain agus Eoin P Ó Murchú (iomaitheoir ar an gclár An Gaeilgeoir is Greannmhaire) ag an gCúirt Filíochta, ní raibh siad i láthair don ghrianghraf, faraor, ach bhí siad linn, go deimhin. Ní raibh sí i láthair, ach chuir an file, Sylvia Bledow, dán ar fáil don Chúirt Filíochta - go raibh míle maith agat, a chara na Cúirte! 

Cléireach na Cúirte an jab a bhí agamsa, ach ba é an Sirriam Gníomhach é féin, Proinsias Mac a'Bhaird, a d'eagraigh an ócáid, a sheol a Bharántas chuig na filí éagsúla; agus ba eisean a bhí i mbun teicneoireachta ar an lá. Go deimhin, is eisean a rinne formhór na hoibre don ócáid, agus a chinntigh go raibh gach rud i gceart ar an láthair - go raibh céad míle maith agat, a Phroinsias! 

A bhuí le hurraíocht ó Foras na Gaeilge, bhí greim bia agus deoch le fáil againn théis na Cúirte, rud a thug deis dúinn uilig aithne, nó athaithne, a chur ar a chéile, agus ar an lucht éisteachta - bhí an-scaifte acu sin i láthair, agus chuir siad go mór leis an ócáid, caithfidh mé a rá - go raibh maith agaibh, a chairde na Cúirte! 

Tá An Chúirt Filíochta ag dul i dtreis agus ag neartú chuile bhliain - filí nua agus filí aitheanta ag teacht le chéile, os comhair na Cúirte, lena ndánta a roinnt le chéile, agus leis an lucht éisteachta. Táim buíoch de chuile dhuine - Proinsias Mac a'Bhaird, Foras na Gaeilge, foireann Oireachtas na Gaeilge -  na daoine sin a dhéanann cinnte de go bhfuil ardán ann dár leithéidí - maith sibh uilig!

Oireachtas na Samhna 2017 - An Chúirt Filíochta

Is ócáid bhliantúil í An Chúirt Filíochta ag Oireachtas na Samhna, agus tháinig Barántas na bliana seo chugam, chomh maith le mo chóip de, ahem, rialacha na cúirte, le déanaí. Tá siad le léamh, thíos, a chairde, le go mbeidh a fhios agaibh céard atá cearr i gceist leo. 

Más rud go bhfuil fonn ort peann a chur le pár. nó méar a leagan ar mhéarchlár, le dán a chumadh don ócáid, bheadh fear eagraithe na hócáide, agus Sirriam Gníomhach na Cúirte, Proinsias Mac A'Bhaird, breá sásta cóip leictreonach de do dhán (nó dhó) a fháil roimh an 2 Samhain, más mian leat do dhán(ta) a bheith le feiceáil ar an scáileán agus é/iad á aithris agat. 

Más mian, agus más féidir é, seol ríomphost chuige, le bhur ndánta, ag pmacabhaird ag gmail ponc com, roimh an dáta thuasluaite. Más mian leat téama a aimsiú do do dhán, tá rogha tugtha ag Proinsias duit, sa bharántas, ach ní gá cloí leis. 

Leagtar béim ar an taobh sóisialta den Chúirt, agus cuirtear fáilte roimh chuile dhuine, bíodh dán cumtha agat nó ná bíodh. 

Beidh sólaistí ar fáil, théis na Cúirte, agus beidh deis againn, ansin, bualadh le chéile (in áit a bheith ag bualadh a chéile, má thuigeann tú leat mé!) Ar ndóigh, ní féidir, riamh, bheith róchinnte céard a tharlóidh i rith na Cúirte, ach is féidir libh na, ahem, deasghnátha a léamh, thíos, le go dtuige sibh an chraic. I ndáiríre. 

A bhuí le Proinsias, agus le hurraíocht ó Foras na Gaeilge, agus le foireann chumasach An tOireachtas, beidh An Chúirt Filíochta ar siúl ag 1:00 i.n., Dé Sathairn, 4 Samhain, Seomra Inis Faithlinn in Óstán Gleneagle. 

Beidh mé féin agus Bríd Ní Mhóráin ansin, le smacht súil a choinneáil ar an gcraic uilig, ar fhaitíos na bhfaitíos go mbeadh an iomarca ólta ag tuirse ar an Sirriam (Ain)ghníomhach. 

                                           Barántas

Do Bhaird, Filí agus Ollaimh na hÉireann, beannachtaí!

Whereas, is fada éigse uasal Fódla ag muirniú an fhocail chothroim, ag santú an natha chaoin agus ag caomhnú friotal na fírinne, é de ghnás aici dúshlán bhodaigh na mbréag a thabhairt bíodh siad anseo in Achadh Airt nó sna críocha imigéin.

Be it known, nár umhlaigh baird Bhanbha riamh roimh chlaon, nár chloígh riamh le heasonóir ná feall, nár éalaigh riamh in aghaidh an éagóra.

Whereas, tá tormán bréan chugainn aniar, claonadh fírinne agus fíricí, corbadh an chirt agus maslú aineolach na macántachta, cén freagra a thabharfaidh filí Inis Ealga ar an táirbhéim bhrúidiúil bhroimnéiseach seo? Cén dúshlán a thabharfaidh siad ar an fhathach bhuí ina thúr eabhair?

Ordaítear duit mar sin subpoena ad testificum a bheith i láthair ag Cúirt i gCill Airne a tionólfar ar an tSatharn, 4 Samhain ag 1.00 san iarnón, chun do chuid fianaise a thabhairt i dtaobh fírinne, fíricí agus feall.

Tugtha faoi mo lámhsa [le huabhar domhaíte agus údarás incheistithe] ar an lá seo, an seachtú lá dhéag de mhí Dheireadh Fómhair, Bliain ár dTiarna Dhá Mhíle agus a Seacht Déag.   

                                                      PROINSIAS MAC A’ BHAIRD

                                                  Sirriam (Ain)ghníomhach

God Save The King!

 Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith gléasta go snasta, labhairt os ard agus a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaíonn sé/sí aire rialtais ar bhealach nuálach turgnamhach].

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar cad is tubaiste ann. Ní aireofar dúnadh an bheáir roimh a ceathair a chlog ar maidin nó ATM Bhanc na hÉireann ina thubaiste phearsanta nó náisiúnta.

Bronnfar dram uisce beatha, crág duilisce agus pins snaoisín ar gach finné a thugann fianaise shásúil. Déantar amhlaidh le deimhniú gur ócáid fhíorghaelach a bheidh ann agus ar eagla gur lig finné ar bith dá c(h)uid gaelachais sleamhnú i dtreo an ghalldachais. Cé nach gcuirfidh neamhGhaelachas bac ar fhinné fianaise a thabhairt, moltar d’fhinnéithe den tsórt seo ligean orthu féin gur fíorGhaeil de shliocht gaelach a bhíonn ag Gaeilgeoireacht ó mhaidin go hoíche iad.

Ar iarratas i scríbhinn ó ⅔ den ghiúire a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig na hAlban, Gaelscoilis, Yola, Shelta agus Gaeilge Thír Chonaill.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is atá gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh cead ag an ghiúiré cathaoireacha a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith agus leoga i ndiaidh imeachtaí na Cúirte agus ní fhéachfar ar seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Seachnaítear na mionghléasanna agus an Hip Hop.

Beidh sé de chead ag an ghiúiré tuilleadh rialacha a chur leis an liosta seo agus nósanna nua a bhunú gan choinne.

An Chúirt Filíochta - Oireachtas na Samhna 2023

Mar a tharla anuraidh, agus neart blianta eile, fiú i 2020 agus i 2021 i rith aimsir Chovid nuair a chuala muid na filí ag aithris ar líne, beidh An Chúirt Filíochta ar ais linn arís i mbliana ag Oireachtas na Samhna. Beidh an Chúirt ar siúl an geábh seo i Seomra Park in Óstán an mBrehon i gCill Airne, ag 1.30i.n. ar an Satharn, 4 Samhain. 

Tá'n Barántas (féach thíos) agus liosta de 'Deasghnátha na Cúirte' faighte agam ón Sirriam gníomhach é fhéin, Proinsias Mac a'Bhaird, an fear a ólann eagraíonn gach rud lá na cúirte. Molaim daoibh na deasghnátha a léamh go cúramach, le deis a thabhairt daoibh fhéin na 'seanfháinní óir' sin a bhailiú, ahem, ar fhaitíos go dteastóidís ar an lá. 

Idir an dá linn, iarrtar oraibh dán amháin (nó dhá dhán ghairide) a sheoladh chuig an sirriam gníomhach ag pmacabhaird ag gmail ponc com, roimh an Déardaoin, 2 Samhain, le bhur dtoil, le go mbeidh deis aige na socruithe teicneolaíochta a dhéanamh. 

Mar is iondúil, cuirtear fáilte roimh lucht aithrise agus lucht éisteachta. Is ócáid shóisialta neamhfhoirmiúil a bhíonn ann, agus a fhad is go gcloíonn chuile dhuine leis na deasghnátha (féach thíos), beidh sé ina raic chraic. Má bhíonn fonn ort dán a scríobh ná a aithris, ní gá cloí le téama na cúirte; tá seans ann go bhfaighidh tú an braon uisce beatha, roinnt duilisc agus snaoisín, pé scéal é. Mar sin fhéin, ná déan dearmad euro dán nó dhó a thabhairt do Phroinsias, roimh ré. 

Bígí ag cumadh, a chairde na filíochta! Agus, ná déan dearmad an scéal a scaipeadh, le bhur dtoil. 

                                ******************************

Barántas

Do Bhaird, Filí agus Ollaimh Bhanbha, beannachtaí!

Whereas, tá aird Chlanna Gael ar chraoltóirí a cuireadh ar ceal cheal chúram ceilte airgid agus an mhórchuid ag caoineadh chliseadh a ruagairí rugbaí sa Fhrainc. 

Be it known, go bhfuil daoine á ndíothú i gCríoch Chanán agus na mílte ar a dteitheadh, go bhfuil fáithe na linne seo ag trasnaíl ar a chéile lena dteachtaireachtaí a chuireann idir fhearg, imní agus amhras ar lucht a n-éisteachta agus go bhfuil neamhshuim an phobail i dtaobh na timpeallachta ina bhagairt sheasta dúinn ar fad. 

Whereas, ó chéadtharraing Aimhirgin críoch na Fódla chuige lena amhrán agus ó chéadmharaigh Finnéagas bradán agus é ar thóir an fheasa, bhí sé d’uchtach ag Éigse Éireann fáistine a dhéanamh, eolas a chuartú agus breithiúnas caoin a thabhairt. Cén eagna anois a roinnfidh sí ar chine Oileán na bhFionn? 

Ordaítear duit, subpoena ad testificum, fianaise a thabhairt os comhair Cúirte a eagrófar ar an tSatharn, an ceathrú lá de mhí na Samhna i gCill Airne ag 1.30 pm, maidir le fealltóirí, fáithe agus fírinne.  

Tugtha faoi mo lámhsa [le húdarás incheistithe] ar an lá seo, an cúigiú lá dhéag de Dheireadh Fómhair, Bliain ár dTiarna Dhá Mhíle Fiche a Trí.           

 

                                                                        PROINSIAS MAC A’ BHAIRD

                                                                                         Sirriam gníomhach

God Save The King! 

                          **********************************

Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaítear aire rialtais ar bhealach nuálach turgnamhach]. 

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar an ceadúnas teilifíse, Patrick Kielty ná cinsireacht ar Mastodon ina thubaiste phearsanta nó náisiúnta.

Bronnfar dram uisce beatha, crág duilisc agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard.

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig, Gaelg, Gaelscoilis, Yola, Shelta agus Gaolainn Iarthar Dhuibhneach. 

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh sé de chead ag an ghiúiré a gcuid seanfháinní óir a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith nó i ndiaidh imeachtaí na Cúirte agus ní fhéachfar air seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Seachnaítear na mionghléasanna agus an Hip Hop.

Ceadaítear don ghiúiré tuilleadh rialacha a chur leis an liosta seo agus nósanna nua a bhunú gan choinne. 

An Chúirt Filíochta - Oireachtas na Samhna 2024

Mar is eol daoibh, a léitheoirí, is ócáid bhliantúil í An Chúirt Filíochta ag Oireachtas na Samhna agus beidh sí ar siúl i gCill Airne arís i mbliana. Tá barántas na bliana seo faighte agam ón Sirriam Gníomhach, Proinsias Mac a'Bhaird, mar a fheicfidh sibh, thíos. 

Aiféala orm faoin moill leis an mbarántas agus le 'Deasghnátha na Cúirte,' ach geallaim daoibh (le cúnamh Bé) go mbeidh Proinsias, Bríd Ní Mhóráin agus mé fhéin ag an gCúirt Filíochta i gCill Airne ar an Satharn, 2 Mí na Samhna, ag 1.30in, mar chualamar go mbeidh neart fíona filí i láthair agus go gcaithfear súil a choinneáil deis a thabhairt dóibh a gcuid dánta a aithris.

I dtaca leis seo, iarrtar oraibh peann a chur le pár, a chairde, agus dán nó dhó a chumadh agus a sheoladh chuig an sirriam gníomhach ag pmacabhaird ag gmail.com, roimh dheireadh na míosa seo, más féidir, le deis a thabhairt dó na socruithe teicneolaíochta a dhéanamh; sin, ar ndóigh, más mian leat go mbeadh do dhán/dánta le feiceáil ar an scáileán taobh thiar díot agus tú i mbun aithrise. 

Ar ndóigh, ní gá cloí le téama na cúirte mar atá luaite sa bharántas, agus ní gá dán a scríobh le cead isteach a fháil; cuirtear fáilte roimh lucht aithrise agus lucht éisteachta, fad is go gcloíonn chuile dhuine leis na deasghnátha (féach thíos.) Ach, má bhíonn fonn aithrise ort, agus gan deis agat an clúdach donn le hairgead dán ann a thabhairt do Phroinsias, roimh ré, fág d'ainm liom fhéin nó le Bríd ag láthair na Cúirte, agus cuirfear d'ainm ar an liosta. 

Ar ndóigh, beidh braon uisce beatha, pinse snaoisín agus duilisc ann do na filí, agus sóláistí ar fáil i ndiaidh na Cúirte. Ní féidir liom tada a chinntiú faoin gcaviar, faoin gcognac ná faoin líne chócaoin, mar ní thabharfaidh an Sirriam cead dom fhéin ná do Bhríd iad a bhlaiseadh dháileadh. 

Ár mbuíochas le Foras na Gaeilge as a gcuid urraíochta, agus le lucht an Oireachtais as a gcuid tacaíochta. Táim ag súil go mór le bhur gcuideachta, a chairde na filíochta!

******************************

                                                                  Barántas

Do Bhaird, Filí agus Ollaimh Bhanbha, beannachtaí!

Whereas, tá cumhacht ghlór an duine ídithe, Maca Míle agus pobail mhacánta na cruinne den bharúil nach dtugtar ach cluas bhodhar dá dtuairimí, dá n-achainní, dá ngearáin.

Be it known, go bhfuil an domhan á réabadh ag cogadh éagórach, go bhfuil faisistigh dhúchasacha ag éirí inár measc agus go bhfuil céad míle doicheall déanta dár bhfáiltí.

Whereas, muirníonn Éigse Éireann an chóir agus is olc leis an bhréag. Ba ghnás ag dámhchuire Fódla ón chianaimsir anall glór a thabhairt don bhalbhán, misneach a bhronnadh orthu siúd ar easpa dóchais. Cén comhairle chaoin a bhronnfaidh sé anois ar chine Oileán na bhFionn, cén focail mheáite a roinnfidh sé ar Ghaelaibh ársa agus ar Ghaelaibh úra leis an dóchas a mhúscailt iontu an athuair?

Ordaítear duit, subpoena ad testificum, fianaise a thabhairt os comhair Cúirte a eagrófar ar an tSatharn, an dara lá de mhí na Samhna i gCill Airne ag 1.30 pm, maidir le deachtóireacht, doicheall agus dóchas.  

Tugtha faoi mo lámhsa [le húdarás incheistithe] ar an lá seo, an t-ochtú lá de Dheireadh Fómhair, Bliain ár dTiarna Dhá Mhíle Fiche a Ceathair.  

                                                     PROINSIAS MAC A’ BHAIRD

                                             Sirriam (mall)ghníomhach

God Save The King! (agus go maire Camilla)

***********************

Deasghnátha na Cúirte

 Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá chuid féin a aithris ach iarrtar ar gach finné a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige. Ní nós bualadh bos a thabhairt agus an finné i lár aithrise [ach amháin sa chás go maslaítear polaiteoir ar bhealach nuálach turgnamhach].

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar díolúintí teanga, tithe saoire sa Ghaeltacht ná ceartúsáid an chlásail choibhneasta ina thubaiste phearsanta nó náisiúnta.

Bronnfar dram uisce beatha, crág duilisc agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard.

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig, Gaelg, Gaelscoilis, Cant, agus Gaelic Ghaoth Dobhaí.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh sé de chead ag an ghiúiré a gcuid seanfháinní óir a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith nó i ndiaidh imeachtaí na Cúirte agus ní fhéachfar air sin mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a chuid fianaise a chanadh, ach ní mór glór ceolmhar binn a bheith aige. Seachnaítear na mionghléasanna agus an Hip Hop.

Ceadaítear don ghiúiré tuilleadh rialacha a chur leis an liosta seo agus nósanna nua a bhunú gan choinne.

An Chúirt Filíochta - Oireachtas na Samhna 2020

Mar is eol daoibh, a léitheoirí, is ócáid bhliantúil í An Chúirt Filíochta ag Oireachtas na Samhna. Is é Proinsias Mac a'Bhaird eagarthóir na hócáide, agus bíonn mé féin agus Bríd Ní Mhóráin mar mhná tí aige. 

Go hiondúil.  

Ach, níl tada 'iondúil' faoin mbliain seo, faraor. Mar sin féin, d'iarr lucht an Oireachtais ar Phroinsias ar mhiste leis cúirt fhíorúil a chur ar fáil d'fhilí na tíre agus, i bhfaiteadh na súl, nár ghléas sé é féin i gclóca an tsirriam ghníomhaigh, agus sheol sé barántas na bliana seo chugainn. (Féach thíos)

Mar sin, a chairde, is físeáin atá uainn, i mbliana. Iarrtar oraibh bhur n-iarrachtaí a thaifeadadh (fón póca, táibléad, nó eile), agus an físeán, mar aon le téacs an dáin, a sheoladh chuig Proinsias ag pmacabhaird ag gmail ponc com, nó chuig WhatsApp uimhir (086)2318698, roimh an Luan, 28 Meán Fómhair, le bhur dtoil. 

Ní gá cloí le téarma an bharántais (is féidir leat dán duine eile a aithris nó a cheol, más mian leat) ach iarrtar ort gan dul thar trí nóiméad - beidh go leor obair theicniúil i gceist, mar a thuigfeá, agus tá súil ag Proinsias físeán mór amháin (40/50 nóiméad) a chur le chéile (le fotheidil fhocal an dáin curtha le físeán an fhile aonair) réidh le seoladh chuig Oireachtas na Gaeilge, le deis a thabhairt dóibh an físeán a chraoladh mar chuid den Oireachtas fíorúil. 

Tá Treoir Taifeadta d'fhíseán le léamh ag bun an leathanaigh seo, a bhuí le hOireachtas na Samhna. 

Mar sin, a chairde, tapaígí an deis! Seans iontach atá anseo litríocht agus filíocht na Gaeilge a thaispeáint go forleathan, ar fud an domhain. Is fearr go fíorúil ná go brách. Go n-éirí go geal le bhur n-iarrachtaí! Seo chugaibh Barántas na bliana seo,

Barántas

Do Bhaird, Filí agus Ollaimh Bhanbha, beannachtaí!

Whereas, is dual d’éigse na hÉireann ceol a chumadh faoi éachtaí chine na nGael, faoi na hoilbhéimeanna a bhaineann dó agus, ó aimsir na dtaoiseach tréan, fúthu siúd a d’imreodh tionchar ar bhánta Fódhla.

 Be it known, tá olagón agus caoineadh géar ag éirí i measc maca Míle agus galar ag réabadh ar bhlár Oileáin na bhFionn. Tá deireadh le spraoi na mban agus tá sult na bhfear in ísle brí, ní bhíonn i súgradh páistí ach cluichí ar líne. Tá ár dtaoisigh úra ag malartú cótaí a fhad is atá cnámha Aoidh Ruaidh á nochtadh sa Spáinn agus tá an phéacóg bhuí san Oileán Úr ag glagaireacht leis i dtólamh.

 Whereas, tá an saol ina roithleán agus cinnteachtaí á gceistiú de shíor, cén iarracht a dhéanfaidh filí na hÉireann a cruth ceart a chur ar an fhírinne, tamhach táisc ár linne a chur i rann?

 Ordaítear duit mar sin, subpoena ad testificum, fianaise a thabhairt do Chúirt a eagrófar tráth na Samhna, le solas a chaitheamh ar ghalair, gearmansaíocht agus glórtha ar cheart dul in éag.

Tugtha faoi mo lámhsa [le húdarás incheistithe] ar an lá seo, an tríú lá de mhí Mheán Fómhair, Bliain ár dTiarna Dhá Mhíle agus a Fiche.

PROINSIAS MAC A’ BHAIRD 

Sirriam gníomhach

 God Save The King!

*************************************

TREOIR TAIFEADTA d’FHÍSEÁN OIREACHTAS NA SAMHNA 2020

Aimsigh do Shuíomh Taifeadta:

Bí airdeallach maidir leis an spás agus leis an gcúlra a roghnóidh tú mar gur ionann an fhíseán a thaispeáint go poiblí agus cuireadh a thabhairt d’aíonna isteach sa spás sin; Cinntigh go mbeidh tú ar do chompord agus go mbeidh gach ní a bheidh ag teastáil uait in aice láimhe agat sula dtosóidh tú;

Déan tástáil roimh ré lena chinntiú go bhfuil dóthain solais sa spás le go mbeidh tú le feiceáil go soiléir.

AN SUÍOMH TAIFEADTA

Déan cinnte go bhfuil tú i seomra ciúin in áit nach mbeidh:

 Fothram ar bith;

 Macalla ar bith; ná

 Aon innill leictreonacha ar siúl sa chúlra. 

CÉARD A BHEIDH AG TEASTÁIL CHUN AN FHÍSEÁN A THAIFEAD?

Fearas atá molta:

 Fón Póca nó Ipad le ceamara ar ardchaighdeán;

 Seastán tríchosach beag (mura bhfuil an trealamh seo agat, socraigh suas an fón póca nó an ipad ar dhromchla mín, cothrom, os do chomhair amach agus daingnigh ansin é ionas nach mbeidh aon bhaol go dtitfidh sé nó go mbeidh sé ag luascadh.)

 AN TAIFEAD

 Ar do cheamara, roghnaigh an socrú le haghaidh íomhá tírdhreacha (ar mhóramh na bhfearas níl le déanamh ach an fearas féin a iompú ar a thaobh;

 Socraigh tú féin os comhair an cheamara ionas go mbeidh tú le feiceáil ó do bhásta aníos go barr do chloiginn, ach fág neart spáis thar timpeall ort féin;

 Bí chomh nádúrtha agus is féidir leat ach b’fhearr gan an iomarca útamála ná bogadh thart a dhéanamh le linn an taifeadta.

 Bíodh do script réidh agat! Nuair a bheidh an fhíseán críochnaithe agat:

 Sábháil an fhíseán; agus

 Seol é chuig an duine cuí ar WhatsApp, Ríomhphost nó WeTransfer.

Beidh Louise Ní Dháibhéid (louise@antoireachtas.ie) ar fáil le comhairle a chur ort má bhíonn aon cheist agat.

Cúirt Filíochta an Oireachtais 2015

Mar is eol d'fhilí na tíre, is ócáid bhliantúil í an Chúirt Filíochta ag an Oireachtas, ó bunaíodh í sa bhliain 2010, agus tá an chúirt ag dul ó smacht ag dul i líonmhaireacht ó shin, a bhuí le cibé Bé atá i gceannas ar an 'cumadh liom' achas sin.   

I mbliana, arís, is é Proinsias Mac A'Bhaird Sirriam Gníomhach agus eagraí na cúirte, agus beidh mé féin, nó an bhean uasal sin, Bríd Ní Mhoráin, ag ól ag feidhmiú mar Chléireach na Cúirte, nó mar, ahem, bhean smachta, mar a thugtar orainn, ó am go chéile. Chuile sheans go mbeidh deoch nó dhó go gcloise sibh dán nó dhó ón triúr againn, mar go bhfuil an nós sin againn, freisin, ó am go chéile. 

Pé scéal é, fuair mise mo Bharántas ón Sirriam Gníomhach cheana, agus tá cóip den Barántas sin, agus cóip de, ahem, Deasghnátha na Cúirte, le léamh, thíos. 

Más mian leat do dhán a bheith le feiceáil ar scáileán agus é á aithris agat, bheinn buíoch díot ach cóip leictreonach a sheoladh chuig Proinsias ag pmacabhaird ag gmail ponc com,  roimh 29 Deireadh Fómhair, sin Déardaoin seo chugainn, le go mbeidh deis aige na socruithe teicniúla cuí a dhéanamh roimh ré. Ar an gcaoi sin, beidh do dhán le feiceáil agus le cloisteáil, ag an am céanna...nach é Proinsias atá cliste!

Is ócáid neamhfhoirmiúil spraíúil a bheas inti, le béim ar an taobh sóisialta den Chúirt. A bhuí le hurraíocht ó Fhoras na Gaeilge, beidh sólaistí ar fáil i ndiaidh na Cúirte, agus cé nach bhfuil brú ar dhuine ar bith dán nua a chumadh, má tá aon duine agaibh ag iarraidh téama, tá 'fáilte, flaithiúlacht agus féile' socraithe ag Proinsias, mar théama na Cúirte. 

An méid sin ráite, mura bhfuil uait ach bheith i láthair, mar éisteoir sa lucht éisteachta, beidh fearadh na fáilte romhat chuig an gCúirt Filíochta, seachtain ó inniu. 

A bhuí le Proinsias, agus le foireann iontach An tOireachtas, beidh an Chúirt ar siúl sa Svuít Newcastle in Óstán an Citywest, Baile Átha Cliath, ar an Satharn, 31 Deireadh Fómhair, 2015, ag 1.00 i.n.. 

Mo chuimhne, an bhfuair sibh aip nua An tOireachtas fós? Tuilleadh faoin aip sin, agus faoi 'Conas Teacht Slán as Oireachtas na Samhna' le léamh anseo, ar Meon Eile...Eoin P Ó Murchú atá ciontach as a scríobh na moltaí san alt sin. 

Proinsias Mac A'Bhaird atá ciontach as an mbarántas, agus as na, ahem, rialacha/deasghnátha, atá scríofa, thíos.

*****

Barántas

Do Bhaird, Filí agus Ollaimh na hÉireann, beannachtaí!

Whereas, de réir fianaise na mbard ón chianaimsir anall, is de bhunadh na Scitia sa Mheánoirthear cine na nGael.

Be it known, gur tháinig an fine bhláthuasal go hInis Ealga in aimsir Mhíle Easpáin, gur chuir an bhandia Éiru fáilte rompu i ndiaidh di Amhrán Aimhirgin a chloisteáil agus gur roinn siad fód Bhanba le Tuath Dé Danann go dtí gur ruaig muid iad trínár ndearmad, neamhshuim agus easpa creidimh.

Whereas, tá cine eile de chuid na Scitia ársa ag déanamh ar chríocha gléghlasa na hÉireann, cén t-amhrán a chanfaidh baird na linne boichte seo i dtaobh na gcuairteoirí seo ón imigéin?

Ordaítear duit mar sin subpoena ad testificum a bheith i láthair ag Cúirt in Áth Cliath a tionólfar ar an Satharn, 31 Deireadh Fómhair (nuair is ísle an brat idir sinn agus an t-aos sídhe) ag 1.00 san iarnón, chun do chuid fianaise a thabhairt i dtaobh fáilte, flaithiúlacht agus féile.

Tugtha faoi mo lámhsa [le neart éirí in airde, ardnós domhaíte agus

údarás incheistithe] ar an lá seo, an tríú lá dhéag de mhí Strictly Come Dancing, Bliain ár dTiarna Dhá Mhíle agus a Cúig Déag.

PROINSIAS MAC A’ BHAIRD

Sirriam Neamhghníomhach

God Save The King!

*****

Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann (fada) réidh aici nó aige ar eagla nach mbeidh rannpháirtíocht shásúil ó fhilí sásúla i láthair lá na Cúirte.

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith gléasta go snasta agus cuma a chur air/uirthi féin go bhfuil fhios aige/aici cad faoi a bhfuil sé/sí ag caint.

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaíonn sé/sí aire rialtais ar bhealach nuálach turgnamhach]. Fágtar faoi dhiscréid oifigigh na Cúirte é cé acu an dtabharfaí bualadh bos d’fhinné sula dtosaíonn sé/sí ag léamh!

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar cad is tubaiste ann. Ní aireofar cúrsaí peile (caide), ceist na Gaeilge nó Joe Mc Hugh ina thubaiste náisiúnta nó pearsanta.

Má théann finné ar bith ar aghaidh ró-fhada lena chuid fianaise, beidh sé de chead ag an ghiúiré é/í a aoradh is ábhar magaidh a dhéanamh de/di.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is atá gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh cead ag an ghiúiré cathaoireacha a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith agus leoga i ndiaidh imeachtaí na Cúirte agus ní fhéachfar ar seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Moltar na mionghléasanna a sheachaint.

Beidh sé de chead ag an ghiúiré tuilleadh rialacha a chur leis an liosta seo agus nósanna nua a bhunú gan choinne.