An Fhírinne Ghlan?

 Deacair é a fheiceáil...

 ...ach tá sé ann.

 Deacair é a fheiceáil...

 ...ach tá sé ann. 

 Deacair é a fheiceáil...

...ach tá sé ann. 

Ó am go chéile, nuair a chloisim 'Let's be clear about this...' ag teacht as béal pholaiteora, tosaíonn mo Phota Amhrais ag blub-blubbáil, agus tosaím ag Hmmm'áil, mar go mothaím, ar an bpointe, bíodh mé ceart nó mícheart, nach soiléir, ar chor ar bith, a bheas a chuid raiméise cainte.

Ar ndóigh, ní hé sin le rá nach bhfuil an fhírinne áit éigin sa méid atá á rá aige ach, go minic, bíonn sé deacair í a aimsiú! 

Seanfhocail, faoi 'Fírinne', ón leabhar Seanfhocla Chonnacht:

Ní chreidtear an fhírinne ó fhear déanta na mbréag.

Níor thacht an fhírinne fear riamh. 

Ná tabhair do bhreith ar an gcéad scéal. 

Ní bhíonn an cath mar an scéal. 

Ritheann an bhréag ach fanann an fhírinne. 

Ceart agus Cearta

Blianta ó shin, agus mise ag fás aníos i gCeantar na nOileán, bhí umar uisce ar chúl an tí againn, sa mbaile. Bhí sé déanta as coincréit, nó ábhar éigin mar í, agus ní raibh clúdach air, ar dtús, más buan mo chuimhne, go dtí gur thit cat isteach ann, agus cuireadh clúdach coincréite air ansin, ar fhaitíos na bhfaitíos go leanfadh aon pháiste againn an cat, is dócha...bhí sé domhain, mar umar uisce, an dtuigeann sibh, agus bhí muide beag, 

Bhíodh an tank, mar a thugamar air, lán le huisce sa gheimhreadh, ó tharla neart báistí ann len é a líonadh, ach is minic, sa samhradh, nach mbáfaí luch ann, ná bac le cat ná le páiste, mar nach mbeadh braon báistí ag titim ón spéir agus, dá bhrí sin, ní bhíodh mórán uisce ar fáil le sconnaí an tí a líonadh, ná le folcadán a líonadh, ná le leithreas a shruthlú, go minic. 

Mar gheall air sin, is dóigh liom, bhí mé cúramach le huisce ar feadh mo shaoil, sé sin le rá, níor chuir mé uisce amú, agus bhí mé iontach buíoch, mar atáim fós, go raibh agus go bhfuil uisce le fáil agam, go fial flúirseach; bíodh sé ina gheimhreadh nó ina shamhradh, bíodh báisteach ann nó ná bíodh. 

Le scéal fada a dhéanamh níos faide, a léitheoirí, tá a fhios agam nach mise an t-aon duine amháin atá tinn tuirseach den chraic seo uilig...an 'craic' i 'craiceáilte' atá i gceist agam, seachas aon rud a bhaineann le spraoi, an dtuigeann sibh...ach, mar sin féin, tá mo phota amhrais ag cur thar maoil, na laethanta seo. 

Tá lucht na polaitíochta, ar chuile thaobh den scéal, feictear dom, agus táim den bharúil go bhfuil dearmad déanta acu ar 'ceart' agus ar 'cearta'...sé sin le rá, tá siad uilig den bharúil go bhfuil siad féin ceart, beag beann ar chearta aon duine eile. Ní dóigh liom féin go bhfuil sé sin ceart. 

Bíodh meas againn ar a chéile, agus bíodh meas againn ar uisce. Gan iad, ní féidir maireachtáil i gceart.  

Cinnteacht nó Amhras

Is é scéal an chait...

...an scéal nach mbeidh amuigh.

An seanfhocal thuas ón leabhar Seanfhocla Chonnacht. Thóg mé na grianghraif ar maidin, le, ahem, caoinchead ó Shióg s'againne. 

Na seanfhocail seo a leanas, ón leabhar céanna, faoin gceannteideal Cinnteacht:

Ní chreideann an tsúil ach an rud a fheiceas sí. 

Fásann níos mó sa ngarraí ná a chuirtear ann. 

Fearr a bheith cinnte ná caillte. 

Bí ceart sula mbí tú dearfa. 

Ná déan dóigh de do bharúil.

Ní den chríonnacht an chinnteacht. 

Agus, faoin gceannteideal Aimhreas, tá na seanfhocail seo:

Ní mar a shíltear a bhítear. 

Is iomaí caoi a léimeas an cat. 

Ní Rámhaille ach Racht

Ní aon ionadh, arsa mé féin liom féin ar maidin, go bhfuil an tír sa phraiseach ina bhfuil sí, más rud go bhfuilimid ag brath ar na bainc le muid a choinneáil ar an mbóthar ceart.

Le bheith féaráilte, bhí an ceart ag an mbanc mo chárta creidmheasa a chealú arú inné - bhí cleasaí áit éigin ag iarraidh mí-úsáid a bhaint as, i ngan fhios dom, an dtuigeann sibh. Is maith ann an tseirbhís a thugann ‘unusual activity’ ar chárta creidmheasa faoi deara in am, agus nach ligean leis, ar mhaithe leis an gcustaiméir. Ach, agus seo fáth mo rachta inniu, chealaigh an banc an cárta i ngan fhios domsa, freisin. 

Cuireadh stop le mo chárta uair amháin eile, díreach sula ndeachaigh mé ar laethanta saoire, anuraidh, ach thug mé an ‘stop’ sin faoi deara in am le cárta nua a fháil – náire an domhain orm i siopa áitiúil nuair nár oibrigh an cárta dom!  Pé scéal é, rinne mé gearán leis an mbanc an lá sin, ní mar gheall gur cuireadh stop leis an gcárta, (unusual activity, arís eile) ach mar gheall nár chuir siad mise ar an eolas faoin stop. Thóg siad m’uimhir fón póca an t-am sin, agus gealladh dom go bhfaighinn téacs, dá dtarlódh aon unusual activity arís, le deis a thabhairt dom an cás a phlé leo, nó cárta nua a fháil uathu, an dtuigeann sibh.  

Ar maidin, ar an bhfón, rinne mé iarracht ar tháirge a íoc le mo chárta creidmheasa, agus bhí mé náirithe, arís eile, nuair nach n-oibreodh an cárta dom. Chuir mé scairt ar an mbanc. Leathuair i ndiaidh dom tús a chur le mo ghlaoch, gach duine acu do mo chur ó rannóg amháin go rannóg eile, fuair mé amach, ó dhuine den fraud squad, gur cuireadh stop leis an gcárta arú inné, mar gheall ar unusual activity a tugadh faoi deara. Chuaigh an comhrá rud éigin mar a leanas:

Mise: I have no problem with the fact that you put a stop on the card, due to the unusual activity that was detected. It is a brilliant service, and I appreciate that you managed to stop the illegal transaction, but why wasn’t I informed?

Banc: We did contact you.

Mise: When?

Banc: We sent you a text message at 4.49pm on the 17^th.

Mise: I’m just looking through my phone inbox here, and I received no text from you on that date.  What number did you send it to?

Banc: 086-XXXXXXX. Isn’t that your mobile number?

Mise: Yes, it is. Where are you based?

Banc: We’re based in the UK.

Mise: You need an international code before my number then, you know?

Banc: I know that.

Mise: I’m not suggesting that you don’t, but you need to use the correct code, in order for me to get the text...

Ní bhfuair mise aon téacs. Banc mór idirnáisiúnta, a léitheoirí. Osna, agus osna eile uaim…

Focail Féilire

‘Is féidir go leor a fheiceáil ach breathnú.’

‘You can observe a lot by just watching.’  An fear seo a dúirt, deirtear.

Agus mé ag léamh, ar an suíomh seo, na n-athfhriotal eile uaidh, cuireann an ceann thuas, agus an ceann ‘Half the lies they tell about me aren’t true.’ Rás an Árais i gcuimhne dom - ar chúis éigin nach féidir liom a roinnt, a léitheoirí, mar nach bhfuilim féin cinnte faoi leath de na smaointe atá ag rith timpeall i mo chloigeann faoin rás céanna.

Mí eile leis an lucht spairne romhainn. Mo chloigeann bocht…

President Tracker an Late Late Show le léamh anseo, agus track de shórt eile, Race for the Áras, le cloisteáil ó phodchraoladh na maidine lucht Green Tea anseo. (4.06 nóiméad)  

Seacht Suas...

…agus tá an táinrith, agus na táinsimh, faoi lán seoil cheana féin.

Sea, a léitheoirí, tá seachtar acu ag rith i Rás an Árais, agus is fúinn, an lucht vótála, a bheas sé an duine is fearr a roghnú don uachtaránacht nó, ar a laghad, is fúinn a bheas sé duine den seachtar a roghnú. 

Níl mo chinneadh déanta agam fós, agus beidh mé ag éisteacht le chuile dhuine den seachtar acu, as seo go lá na vótála, sula dtabharfaidh mé mo bhreith agus duine acu a roghnú, an duine is fearr a cheapfainn féin a d’fheilfeadh don phost.

Beidh An Pota Amhrais ag dul ar an tine arís, agus seo chugaibh, arís eile, an t-oideas as a mbainim féin úsáid, agus breith faoi mo bhráid agam: 

‘Cuirim An Pota Amhrais ag fiuchadh. Isteach sa phota caithim na pointí feolmhara, ceann i ndiaidh a chéile. Cuirim salann mo smaointe isteach leis na pointí éagsúla, ceann i ndiaidh a chéile. Má thosaíonn an teas ag ardú, nó má thosaíonn an bhoilgearnach ag blub-blubbáil le pointe feola ar leith, bíonn a fhios agam ansin go bhfuil an píosa feola sin rórighin domsa, ábhar éigin ann nach réiteoidh le mo ghoile, agus go mbeidh deacracht agam é a shlogadh.’

Mura bhfuil sibh tinn tuirseach ag éisteacht leis an gcraic uilig go dtí seo, a vótálaithe, tá súil agam go bhfaighidh sibh ábhar sásúil uachtaráin as bhur bPota Amhrais féin.