Féile Pan Cheilteach 2026 - An Gearrliosta

 

Reáchtálfar Comórtas Náisiúnta Amhrán Nuachumtha Pan Cheilteach ’26 sa VISUAL Carlow, in Amharclann George Bernard Shaw, Ceatharlach, oíche Dé Sathairn, 24 Eanáir ag 8.00i.n.

As 46 iarratas, roghnaíodh 15 amhrán don ghearrliosta. I measc na n-amhrán ar an ngearrliosta (féach thíos) tá cinn ó Chonamara, Dún na nGall, Baile Átha Cliath, Ciarraí, Ceatharlach, Maigh Eo, Cill Chainnigh agus Loch Garman.

Is iad na moltóirí ná an t-amhránaí, Charlie McGettigan, an t-amhránaí agus iarbhall den bhanna Celtic Woman, Órla Fallon, agus Martin Bridgeman, láithreoir leis an stáisiún raidió KCLR96FM.

Is é an ceoltóir agus cumadóir Ollie Hennessy a bheidh ina stiúrthóir ceoil ar an oíche, agus ina chuideachta beidh an Pan Celtic House Band.

Osclófar na doirse ag 7.00i.n. agus cuirfear tús le himeachtaí na hoíche ag 8.00i.n. Beidh fáilte roimh chách. Is féidir ticéid ar €15 a chur in áirithe anois ag boxoffice@visualcarlow.ie, nó ag 059 9172400, nó is féidir íoc ag an doras ar an oíche.

Má tá tuilleadh eolais uait, is féidir dul i dteagmháil le Bríde ar 087 2857048, Emma ar 085 1340047 nó seol ríomhphost chuig pancelticcarlow@gmail.com.

An Gearrliosta

1. Áine Durkin. “Briseadh Croí”. Conamara / Dún na nGall

    (Amhránaí: Méabh Ní Lochnáin)

2. Dave Barron & Fiach Ó M “Dúlra Scriosta” Ceatharlach

3. Bernard McCabe. “Tabhair Dom Do Lámh” Maigh Eo

4. Seán Breathnach. “Ceatharlach Le Chéile”. Ceatharlach

5. Paul Kelly & Damian. “Imigh Ón Áit Seo”. BÁC.

6. Damian Mac Gabhann “Hé Hó Craic ar an mbád”. BÁC.

7. Emmet Jones/Dara Eaton. “Mo Ghrása” Dara & The Patsys. Ceatharlach

8. Fergal Cantona. “Caoineadh Deirdre” Cill Chainnigh.

9. Stephen Murphy. “Aithrí”. Loch Garman

10. enCÓRe. “Ós Do Chomhair”. Ceatharlach

11. Éire & Chulainn “Áit a Bhíonn Faoi Uisce”. Loch Garman

12. Noeleen Ní Cholla “Fan Liom”. Gaoth Dobhair, Dún na nGall

13. Amano Miura. “An Domhan Thíos” An tSeapáin & Cill Airne, Ciarraí

14. Éabha Breathnach. “Ceanndána”. Conamara.

15. Oisín & Gaelcholáiste. “Siúl Ar Aghaidh”. Ceatharlach.

An Chúirt Filíochta - Oireachtas na Samhna 2025

Tá ár n-ócáid bhliantúil, An Chúirt Filíochta, ar ais linn arís agus, an geábh seo, beidh muid uilig ag tabhairt ár n-aghaidh agus ár ndánta i dtreo Bhéal Feirste, áit a mbeidh Oireachtas na Samhna ar siúl idir 29 Deireadh Fómhair agus 2 Samhain.

Is ar an Satharn, 1 Samhain, ag 2:00in, i gCultúrlann McAdam Ó Fiaich a bheas muid uilig ag bailiú le chéile le réabadh a dhéanamh aithris a dhéanamh ar na dánta a bheas cumtha againn don Chúirt.  

Mar is iondúil, beidh mé fhéin agus Bríd Ní Mhóráin ag crochadh thart, mar mhná tí, le súil a choinneáil ar Phroinsias dháileadh an Cognac, caviar agus cócaoin, agus, más gá, triail a bhaint astu roimh ré, ar mhaithe libhse, a chumadóirí; le bheith cinnte go bhfuil siad ar ardchaighdeán, an dtuigeann sibh.  

Beidh obair theicniúil le déanamh ag Proinsias Mac a'Bhaird, sirriam gníomhach agus eagraí na Cúirte, in am don ócáid, mar sin bheadh sé thar a bheith buíoch ach bhur gcuid dánta a fháil roimh an Déardaoin, 30 Deireadh Fómhair, chuig pmacabhaird ag gmail ponc com, sé sin, más mian leat do dhán/dhánta a bheith le feiceáil ar an scáileán agus tú i mbun aithrise. 

Ní gá cloí le téama nó téamaí an bharántais, ach iarrtar ort gan ach dán amháin nó dhá dhán ghairide a thabhairt leat, mar d'fhéadfadh cuid den lucht éisteachta titim ina gcodladh bheith ag dul chuig ócáid eile, agus beidh orainn cloí leis an am atá leagtha síos don Chúirt Filíochta ag lucht eagraithe an Oireachtais. Bíonn siad sách cantalach cúramach faoi chúrsaí ama, mar a thuigfeá, agus caithfidh muid a bheith cinnte go mbeidh am againn dul ar ragairne do na sólaistí, ag deireadh na Cúirte. Ár mbuíochas le Clár na Leabhar Gaeilge/Foras na Gaeilge as a gcuid urraíochta fialmhaire. 

Is ócáid shóisialta atá i gceist leis an gCúirt Filíochta, agus beidh fáilte roimh lucht éisteachta chomh maith le lucht aithrise. Cuirtear fáilte ar leith roimh fhilí nua, is cuma cén aois iad. Tá muid thar a bheith buíoch d'fhoireann an Oireachtais as a gcuid tacaíochta. Cuidíonn siad linn, chuile bhliain, croí na filíochta a choinneáil ag bualadh. 

Iarrtar oraibh, le bhur dtoil, Deasghnátha na Cúirte a léamh go cúramach, ar fhaitíos go mbeadh gá le breab aon cheist agaibh do na hoifigigh, roimh an gCúirt. 

Barántas

Do Bhaird, Filí agus Ollaimh Bhanbha, beannachtaí!

Whereas, ós tearc an éisteacht a thugtar don éigse, tá an domhan thoir agus an domhan thiar ar shiúl chun sioparnaí. Cuireann fáithe fealltacha cogair chalaoise i gcluas agus is minice bréag agus bladar á chluinstin ag pobal fulangach. Thairis sin, tugtar ár n-ógánaigh a thugann dúshlán ceoil ar ghéarleanúint agus cinedhíothú os comhair bhreithimh na nGall lena nglórthaí a chur ar ceal.

Be it known, tá maorgacht ár mbratacha á chlaonadh, tá síocháin ár ndaoine á réabadh agus go bhfuiltear ag iarraidh beag a dhéanamh dár n-amhráin agus dár n achainíocha.

Whereas, tá ceithre chuid de Chúig Achadh Uisnigh ag roghnú ceann urra úr a labhrós ar a son. Cén dán molta a chumfaidh Éigse Éireann dár n-uachtarán nua agus cén chomhairle a chuirfear uirthi agus í ag iarraidh Críocha Fáil a mhuirniú agus threorú le go mbeidh dóchas agus rath ar a chlann?

Ordaítear duit, subpoena ad testificum, fianaise a thabhairt os comhair Cúirte a eagrófar ar an tSatharn, an chéad lá de mhí na Samhna i mBéal Feirste cois cuain ag 2.00 pm, maidir le bratacha, brúidiúlacht agus bearta dóchais.

Tugtha faoi mo lámhsa [le húdarás incheistithe] ar an lá seo, an dara lá dhéag de Dheireadh Fómhair, Bliain ár dTiarna Dhá Mhíle Fiche a Cúig.

                                                            PROINSIAS MAC A’ BHAIRD
                                                                               Sirriam (mall)ghníomhach

God Save The King!

Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá chuid féin a aithris ach iarrtar ar gach finné a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige. Ní nós bualadh bos a thabhairt agus an finné i lár aithrise [ach amháin sa chás go maslaítear lucht uabhair ar bhealach nuálach turgnamhach].

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar LGFA Dhún na nGall, tacsaithe Bhéal Feirste ná Jim Gavin ina thubaiste phearsanta nó náisiúnta.

Bronnfar dram uisce beatha, crág duilisc agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard.

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig, Gaelg, Gaelscoilis, Cant, agus Gaelic Bhóthar na bhFál.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh sé de chead ag an ghiúiré a gcuid seanfháinní óir a chaitheamh ar an fhinné.

Taispeántar an meas is dual d’oifigigh na Cúirte agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith nó i ndiaidh imeachtaí na Cúirte agus ní fhéachfar air sin mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a chuid fianaise a chanadh, ach ní mór glór ceolmhar binn a bheith aige. Seachnaítear na mionghléasanna agus an Hip Hop.

Ceadaítear don ghiúiré tuilleadh rialacha a chur leis an liosta seo agus nósanna nua a bhunú gan choinne.

Féile Idirnáisiúnta Pan Cheilteach 2025

Beidh tús á chur leis an bhFéile Idirnáisiúnta Pan Cheilteach an tseachtain seo chugainn, i gCeatharlach, am a ndéanfar ceiliúradh ar chultúir, ar thraidisiúin agus ar theangacha Ceilteacha na sé náisiún a bheidh páirteach ann; Éire, Alba (Albain), Breizh (An Bhriotáin), Cymru (An Bhreatain Bheag), Kernow (Corn na Breataine) agus Mannin (Oileán Mhanann).  

Beidh an fhéile ar siúl ón 22-26 Aibreáin, agus a bhuí leis na coistí idirnáisiúnta agus leis an gcriú iontach atá acu i nGlór Cheatharlach, mar aon le hurraitheoirí agus le comhpháirtithe na féile, tá clár den scoth curtha le chéile acu; is féidir leagan PDF de chlár na n-imeachtaí a íoslódáil anseo. 

Mar a fheicfidh sibh ó chlár na n-amhrán, thíos, bhí an Comórtas Náisiúnta Amhrán Nua Pan Cheilteach ar siúl ag deireadh mhí Eanáir, agus d'éirigh le Gráinne Álainn Ní Fhátharta an bua a fháil, arís, an geábh seo le m'amhrán nuachumtha, Fágtha Gan Freagraí. Beidh Gráinne ag casadh an amhráin, mar ionadaí na hÉireann, ag an bhféile idirnáisiúnta seachtain ón Déardaoin seo chugainn, an 24 Aibreán. Go n-éirí go geal léi, agus leis an bhféile ina hiomláine. 

Tréaslaím a mbua le Gráinne (1ú háit, Amhrán #2), le Éire Ní Fhaoláin & Chulainn Ó Faoláin (2ú háit, Amhrán #11) agus le Anne Marie Ní Chonchubhair (3ú háit, Amhrán #8). Ní raibh mé fhéin i láthair ar an oíche, ach bíonn na comórtais le fáil beo ar líne agus d'éirigh liom gach amhráin a fheiceáil agus a chloisteáil beo ar an oíche. 

Mo bhuíochas ó chroí le mo dheirfiúr, Angela, a ghlac an duais ar mo shon, agus do Ghráinne a tháinig an bealach uilig as Conamara, ainneoin an damáiste a rinne stoirm Éowyn ar fud na tíre. Go deimhin, comhghairdeachas leis na hiomaitheoirí uilig. Rinne siad éacht nuair a d'éirigh leo uilig a mbealach a dhéanamh go dtí an Visual i gCeatharlach tar éis na drochbhaile a bhí curtha ag an stoirm ar an tír. Maith sibh uilig! 

Féile Pan Cheilteach 2025 - An Gearrliosta

Tá an gearrliosta fógartha, agus tá ríméad orm go bhfuil amhrán nuachumtha liom san áireamh arís i mbliana. 

Is í Gráinne Ní Fhátharta a bheas ag casadh an amhráin 'Fágtha gan Freagraí' dom, agus táim fíorbhuíoch dise, do choiste na féile agus do na hurraitheoirí uilig as a gcuid ionchuir - tugann a leithéidí deis domsa, agus do na cumadóirí eile, beatha a thabhairt dár n-amhrán nuachumtha Gaeilge ar an stáitse i gCeatharlach.

Beidh an comórtas le feiceáil beo ar leathanach na féile ar Facebook, chomh maith. Go raibh céad míle maith agaibh, Bríde agus Emma, as an méid oibre a dhéanann sibh ar ár son, le cinntiú go mbeidh oíche den scoth againn san amharclann i rith an chomórtais. 

Buíochas ar leith chuig Ollie Hennessy, stiúrthóir ceoil na féile agus baill den choiste, a thugann tacaíocht iontach do na hiomaitheoirí uilig, roimh ré agus ar an oíche. 

Cé nach féidir liom bheith i láthair, ó tharla go mbeidh mé thar lear ar an oíche, beidh mo shúile dírithe ar leathanach Facebook ón 8:00 i.n - gúim gach rath ar na hiomaitheoirí uilig! 

Dáta:          Dé Sathairn, 25/1/’25 @ 8i.n.

Ionad:        Amharclann GB Shaw@VISUAL, Ceatharlach.

Moltóirí:    John Spillane, Louise Cantillon agus Shannon Redmond         

                                         Na hAmhráin agus na Cumadóiri:

1.    Damian Mac Gabhann.                    “Aodhla”                             Baile Átha Cliath

2.    Áine Durkin.                                     “Fágtha gan Freagraí”       Conamara/Dún na nGall

3.    Oisín MacCinnéide + micléinn        “B’fhéidir gur Féidir”         GC Ceatharlach

4.    Tony Dunne.                                      “Mise á rá Leat”                   Baile Átha Cliath                    

5.    Paul Kelly.                                        “Ciall agus Réasún”            Baile Átha Cliath

6.    Fergal Canton.                                “Banríon Mór Ríoga”            Cill Chainnigh

7.    MJ Mac Pháidín.                            “Ag Fágáil Thú”                     Dún na nGall

8.    Aine Máire Ní Chonchobhair.         “Féileacán”                          An Spidéal, Conamara

9.    Emer O’Flaherty.                            “Stáisiún Traenach”              An Clár

10.  Paul Byrne.                                    “An Biorán 3 Dhath”              Baile Átha Cliath

11.  Éire & Chulainn Ó Faoláin.         “An Gealbhan”                       Loch Garman

12.  Shea Tomkins.                                 “An Áit is Sona”                    Loch Garman

13.  Alanagh Ní Ghríofa.                        “Caill sé féin”                        Conamara

14.  Sharon Ní Chuilbín.                      “Amhrán nad Tonn”                Muigheo   

15.  Caitríona Lane.                              “Ar an Trá Thall”                   Co. na Gaillimhe

Féile Pan Cheilteach 2025

Preas Eisiúnt

Comórtas Amhrán Nua-Chumtha Pan Cheilteach 2025

Tá an Comórtas Náisiúnta Amhrán Nua-Chumtha Pan Cheilteach 2025 fógartha

agus beidh míle fáilte roimh rogha leathan iarratais.

Is comórtas é seo chun amhrán nua a aimsiú le bheith san iomaíocht ar son na

hÉireann ag Féile Idirnáisiúnta Pan Cheilteach ‘25. Ní foláir na hamhráin a

bheith as Gaeilge agus is gá na liricí mar aon leis an gceol a bheith nua-chumtha.

Cuireann an comórtas áirithe seo fáilte roimh gach stíl amhráin idir amhráin

traidisiúnta, pop, amhráin tíre, rac nó rap, snagcheol agus eile.

Ní foláir iarratais a bheith istigh faoi 5i.n. Dé Luain, an 30ú lá de Mhí na Nollag

‘24. Déanfar gearrliosta de na hiarratais agus beidh na hamhráin a roghnófar le

canadh beo ag an gComórtas Náisiúnta a bheidh ar siúl Dé Sathairn, 25ú Eanair

2025 in Amharclann GB Shaw, Ceatharlach. Beidh painéal moltóirí ann chun na

hamhráin a mheas ar fheabhas na bhfocal, an cheoil agus cur i láthair. 

Déanfaidh IMRO i gcomhar le Gael Linn urraíocht ar an gcomórtas náisiúnta.

Bronnfar duais €1,000 agus trófaí náisiúnta ar an amhrán a roghnóidh na

moltóirí chomh maith le bheith mar iarratas na hÉireann ag an gcomórtas

idirnáisiúnta a bheidh ar siúl le linn Féile Idirnáisiúnta Pan Cheilteach 2025 a

bheidh ar siúl i gCeatharlach ón 22ú go 26ú Aibreán an Cháisc seo chugainn. 

Is ansin a bheidh an t-amhrán in iomaíocht leis na hamhráin nua-chumtha ag na

tíortha ceilteacha eile ina measc Alba, an Bhreatain Bheag, Oileán Mhanann, an

Chorn agus an Bhriotáin.

Ní foláir iarratais a sheoladh go leictreonach chuig pancelticcarlow@gmail.com

nó dlúthdhioscaí a chur sa phost chuig Comórtas Amhrán Pan Cheilteach, Glór

Cheatharlach, Áras na nÓg, Éire Óg, Bóthar Uí Bhriain, Ceatharlach R93 Y020

roimh 30ú Nollaig 2024.

Is féidir tuilleadh eolais a fháil ach labhairt le Bríde nó Emma ar 087 2857048,

085 1340047 nó scríobh chuig pancelticcarlow@gmail.com.

Féile Pan Cheilteach 2024 - Amhrán Nuachumtha - Na Torthaí

Cé nach raibh mé fhéin in ann a bheith i láthair oíche Sathairn, bhí mé in ann na hamhráin uilig a chloisteáil beo ar Facebook a bhuí le hobair iontach an choiste eagraithe i nGlór Cheatharlach. Más mian libh éisteacht siar leis an gcomórtas amhránaíochta, is féidir éisteacht siar anseo, faoi 'Videos from this Event.' Tosaíonn an chéad amhrán ag an bpointe 30.36 ar an bhfíseán. 

Comhghairdeachas ó chroí le, 

1.  Éabha Breathnach as an gCeathrú Rua i gConamara, a thug léi an chéad áit lena hamhrán álainn "Na Pictiúir ar an mBalla," amhrán a chum agus a chas sí ag Oireachtas na Gaeilge 2021, amhrán faoin gcumha a d'airigh sí agus í ag fágáil a baile den chéad uair (41.08, amhrán uimhir 3); 

2.  leis an ngrúpa Burnchurch (Cill Chainnigh) a tháinig sa dara háit leis an amhrán "Maidin" amhrán a chum Éanna Ó Casaide (ball den ghrúpa/clann,) amhrán a cumadh do cheolchoirm a reáchtáladh an samhradh seo caite in ómós do Rónán Mac Aodha Bhuí (1.46.50, amhrán uimhir 9); 

3.  leis an ngrúpa enCÓRe (Ceatharlach) a tháinig sa tríú háit leis an amhrán "Thuas Seal, Thíos Seal," amhrán a chum Melíosa Breathnach agus Clár Ní Dhuinn (baill den ghrúpa). amhrán faoi dhóchas agus amhrán lán dearfachta - 'níl tuile dá mhéad nach dtránn' téama an amhráin. (2.02.45, amhrán uimhir 11)

Is féile ar leith í an fhéile seo a thugann deis do chuile aoisghrúpa a n-amhrán nuachumtha a chur i láthair ar ardán poiblí. Mar is léir ón bhfíseán a chonaiceamar ar Facebook, cuirtear fáilte roimh chuile chineál stíl amhráin agus ceoil, agus cuireann an banna ceoil tí (faoi stiúir Ollie Hennessy, fear uasal a chuireann an dua air fhéin an tionlacan is fearr a chur ar fáil do chuile iomaitheoir, a labhraíonn leo roimh ré, a chuidíonn leo ar chuile bhealach a fhéadann sé) banna a chuireann tionlacan den scoth ar fáil don amhránaí nó don ghrúpa, más mian leo tionlacan ar an oíche.

Ní thuigim cén fáth nach bhfuil an comórtas seo le cloisteáil beo ar TG4, nó craolta ina hiomláine ar bhealach éigin ag na craoltóirí seirbhíse poiblí. Tá scoth na n-amhrán nuachumtha i nGaeilge ag teacht ar an bhfód chuile bhliain ag an bhféile seo, le 50 bliain anuas. Ní dhíríonn an fhéile ar amhráin ar an sean-nós amháin, ná ar amhráin cheol tíre amháin, mar shampla; bíonn meascán de sheánraí éagsúla le cloisteáil chuile bhliain. 

Ba mhaith liom mo bhuíochas a ghabháil le coiste na féile, Ollie, Emma, agus Bríde, a dhéanann obair na gcapall don chomórtas seo ar mhaithe leis na cumadóirí agus na hamhránaithe uilig; do na hurraitheoirí a thacaíonn go fial flaithiúil leis an bhféile seo, agus don lucht taca uilig a chuidíonn ar an stáitse ar an oíche. Murach iad!

Mo bhuíochas, freisin, le Seosamh 'Josie' Mac Donnacha, a chas m'amhrán nuachumtha ag an gcomórtas, "Is Mise Mé Fhéin," (1.53.38, amhrán 10), agus do Raidió na Gaeltachta as na hagallaimh a dhéanann siad le lucht na féile, roimh an bhféile agus ina diaidh. Tá agallaimh déanta agam leo, mar chumadóir, thar na blianta, mar a rinne mé ar  Raidió Fáilte, Raidió na Life agus ar Ruaille Buaille le Colm Ferriter ar Highland Radio. Tá lucht taca na féile ag méadú chuile bhliain. Go raibh céad míle maith agaibh uilig!

Beidh Éabha ag déanamh ionadaíochta thar ceann na hÉireann ag an gcomórtas amhránaíochta a bheidh ag siúl ag an bhFéile Idirnáisiúnta Pan Cheilteach ar an 4 Aibreán, agus guím gach rath uirthi - go n-éirí go geal léi!

Is féidir ticéid don ócáid a chur in áirithe anseo, agus is féidir tuilleadh eolais faoi na hócáidí uilig a bheidh ar siúl ag an bhféile idirnáisiúnta a fháil anseo.  

Féile Pan Cheilteach 2024 - An Gearrliosta

Mar is eol daoibh, ó mo bhlagmhíreanna eile ar an ábhar go dtí seo, beidh an Comórtas Náisiúnta Amhrán Nuachumtha Pan Cheilteach ar siúl ar an 27ú den mhí seo in Amharclann GB Shaw/Ionad Ealaíne VISUAL i gCeatharlach. Fógraíodh gearrliosta na n-amhrán inniu. Tá 14 amhrán roghnaithe as na hiarratais uilig, mar a leanas,

1.      Conor Bowman/Ian Smith (Iarmhí) - Ag Feitheamh ar an Ghrian  

         Diane Canon an t-amhránaí. 

2.      Áine Durkin (Gaillimh/Dún na nGall) - Is Mise Mé Fhéin 

         Seosamh Mac Donnacha (Conamara) an t-amhránaí. 

3.     Damian Mac Gabhann (BÁC)  - Tomás Ó Cuirín

        Clann agus an Blow In á chasadh. 

4.     Aidan Cranny & Damian Mac Gabhann (BÁC) - A Chuid Machnaimh i Mo Pheann 

        Aileen Treanor an t-amhránaí. 

5.     Brí Carr (Dún na nGall) - Táim Anseo

        Brí agus a cairde á chasadh. 

6.     Caitríona Lane (Gaillimh)  - An Ghaoth

        Caitríona í fhéin á chasadh. 

7.     Niamh Ní Chatháin (BÁC) - Tar Aníos

        Niamh í fhéin á chasadh. 

8.     Melíosa Breathnach & Clár Ní Dhuinn (Ceatharlach) - Thuas Seal, Thíos Seal

        enCÓRe á chasadh.

9.      Sheona Ní Mháille (Maigh Eo/Gaillimh) - Cá Bhfuil Mé?

         Sheona í fhéin á chasadh. 

10.    Oisín Mac Cinnéide (Cill Chainnigh/GCC) - Anois is gach aon Lá 

         Oisín agus a chairde á chasadh. 

11.    Éabha Breathnach (Conamara) - Na Pictiúir ar an mBalla

         Éabha í fhéin á chasadh.

12.     Éanna Ó Casaide (Cill Chainnigh) - Maidin 

          Grúpa Burnchurch á chasadh. 

13.    Sharon Ní Chuilibín (Maigh Eo) - Mo Sheanmháthair

         Sharon í fhéin á chasadh. 

14.    Mairéad Ní Chríodáin - Rudaí Milse

         Mairéad í fhéin á chasadh. 

Is iad na moltóirí i mbliana ná Órla Fallon (amhránaí agus cláirseoir), Tadhg (ceoltóir, amhránaí, cumadóir) agus Niamh de Búrca (amhránaí). Mar is iondúil, is é Ollie Hennessy a bheas ina stiúrthóir ceoil ar an oíche.

Beidh na doirse ar oscailt ón 7.30i.n. agus cuirfear tús le himeachtaí na hoíche ag 8.00i.n. Cead isteach €15. Is féidir íoc ag an doras nó ticéad a chur in áirithe anseo. 

Is iad an coiste iontach ag Pan Cheilteach Cheatharlach atá ag reachtáil an chomórtais agus is féidir tuilleadh eolais a fháil ó 087-2857048 (Bríde), ó 085-1340047 (Emma) nó seol ríomhphost chuig pancelticcarlow@gmail.com.

Go n-éirí go geal leis an gcomórtas! An-jab déanta ag an gcoiste, mar is iondúil leo. 

Féile Pan Cheilteach 2024

Bhí mé ar mo bhealach abhaile sa charr as Muineachán Dé Luain seo caite nuair a chuala mé Bríde de Róiste (Glór Cheatharlach) ag labhairt le Marcus Mac Conghail ar an gclár Iris Aniar ar Raidió na Gaeltachta. Bhí Bríde ag labhairt faoin bhFéile Pan Cheilteach, an fhéile náisiúnta agus an fhéile idirnáisiúnta, a bheidh ag siúl i gCeatharlach an bhliain seo chugainn. 

Is féidir éisteacht siar leis an gclár anseo, áit a gcloisfidh sibh Bríde ag insint do Mharcus, agus an lucht éisteachta, faoin gComórtas Náisiúnta Amhrán Nuachumtha Pan Cheilteach, atá ag súil ar an 27 Eanáir 2024 in Amharclann George Bernard Shaw i gCeatharlach (tuilleadh eolais, foirm iarratais agus rialacha le fáil anseo). 

Mar is eol do léitheoirí rialta an bhlag seo, tá an-mheas agam ar an gcomórtas ar leith seo, agus bhí mé páirteach ann, go rialta, thar na blianta.  Deis iontach atá ann do chumadóirí amhrán nuachumtha Gaeilge a chur inár láthair, agus bíonn na duaiseanna go maith - €1000 don amhrán a roghnaítear ag an bhféile náisiúnta (a bhuí le IMRO), agus €1500 don amhrán a bhuann an Fhéile Idirnáisiúnta i Mí Aibreáin. 

Tá agaibh go dtí an 5 Eanáir 2024 bhur n-iarratais a sheoladh chuig an gcoiste. Idir an dá linn, is féidir tuilleadh eolais a fháil ó Bhríde nó ó Emma ag 085 2857048 nó 085 1340047, nó seol ríomhphost chuig pancelticcarlow ag gmail ponc com. 

Mo chuimhne, ní gá bheith róbhuartha faoi chaighdeán an taifeadta a sheolfar isteach - beidh deis agaibh bheith ag cleachtadh má éiríonn libh áit a fháil ar an ngearrliosta, agus beidh an fear uasal Ollie Hennessy ar fáil, lena bhanna ceoil agus a chumas eagarthóireachta, le cúnamh agus comhairle a thabhairt, más gá, oíche an chomórtais. 

Is cosúil go mbeidh mé gnóthach idir anois agus an spriocdháta. Bígí ag cumadh, a chairde!

Féile Idirnáisiúnta Pan Cheilteach 2023

Is gearr uaim an bóthar go Ceatharlach, áit a mbeidh tús á chur leis an bhFéile Idirnáisiúnta Pan Cheilteach arís, amárach. Tá cóip den chlár le fáil anseo agus, mar a fheicfidh sibh, is clár iontach é. Comhghairdeachas leis na coistí uilig ó na tíortha Ceilteacha éagsúla - déanann sibh an-jab, a chairde!

Ní raibh an fhéile ar siúl le trí bliana anuas, mar gheall ar an diabhal sin Covid, ach mar a fheicfidh sibh ón gclár, beidh ceiliúradh á dhéanamh ar chuile ghné de chultúr na dtíortha Ceilteacha - ceol, scéalaíocht, damhsa, filíocht, amhráin, logainmneacha, scannánaíocht, seisiúin srl. - ón 11-16 Aibreán. 

Ag an gComórtas Amhránaíochta Idirnáisiúnta i mbliana, beidh dhá amhrán san iomaíocht don tír seo, an grúpa Encóre lena n-amhrán, Cion Cairde, (amhrán buaiteach na féile náisiúnta 2023) agus Gráinne Ní Fhatharta le hamhrán a chum mise, Mar a Bhíonn (amhrán buaiteach na féile náisiúnta 2020).  

Táim buíoch de choiste na Féile Idirnáisiúnta as an gcinneadh a rinne siad deis a thabhairt do na tíortha Ceilteacha éagsúla buaiteoirí na bliana 2020 a chur san áireamh sna comórtais, i mbliana. Go n-éirí go geal leo uilig!

Mo chuimhne, comhghairdeachas ó chroí leis an ngrúpa Encóre as an gcéad áit a bhaint ag an bhFéile Náisiúnta Pan Cheilteach i mbliana lena n-amhrán, Cion Cairde; le Sonny Casey a tháinig sa dara háit le Leon, leagan Gaeilge dá hamhrán, Lion; agus le hÉabha Breathnach a tháinig sa tríú áit lena hamhrán, Ó Neamh go Talamh. 

Féile Pan Cheilteach 2023

Tá sí ar ais!

16 amhrán atá ar an ngearrliosta, i mbliana, agus guím gach rath ar na hiomaitheoirí uilig. Beidh an comórtas ar siúl sa Visual i gCeatharlach ar an 28 Eanáir. Tá na sonraí ón bpreaseisiúint, faoin gcomórtas agus faoi na rannpháirtithe agus na hamhráin, le léamh, thíos. 

Tá áthas orm a rá go bhfuil amhrán nuachumtha liom fhéin ar an ngearrliosta don Chomórtas Náisiúnta Amhrán Nuachumtha i mbliana; amhrán a chum mé faoin ngalar Alzheimer atá ann, agus táim buíoch de m'amhránaí, Domhnall Ó Braonáin, agus de Bhróna Ní Cheallacháin agus d'Éadaoin Nic Dhonnacha, as a bheith sásta an t-amhrán a chur i láthair ar mo shon. 

Táim buíoch de na hurraitheoirí as an deis seo a thabhairt dúinne, lucht scríofa na n-amhrán Gaeilge, ár gcuid amhrán nuachumtha a chur i láthair lucht éisteachta, agus táim fíorbhuíoch don fhoireann uilig i nGlór Cheatharlach as an méid oibre a dhéanann siad ar ár son, agus ar son na teanga. 

                             **********************                                    

Reachtáilfear Comórtas Náisiúnta Amhrán Nua-Chumtha Pan Cheilteach 2023 in Amharclann GB Shaw, Ceatharlach oíche Dé Sathairn, 28ú Eanair ag 8.00i.n. As breis is 30 iarratas san iomlán don chomórtas i mbliana, tá 16 amhrán den scoth roghnaithe don ghearrliosta le bheith páirteach sa chraobh.  

I measc na n-amhrán ar an ngearrliosta tá cinn as Co. na Gaillimhe, Dún na nGall, An Iarmhí, Baile Átha Cliath, Corcaigh, Muigheo, Cill Chainnigh agus Ceatharlach.

Cuirfear na hamhráin i láthair beo ar an 28ú Eanair i gCeatharlach os comhair lucht féachana. ‘Siad na moltóirí ar an oíche ná an t-amhránaí aitheanta Aoife Scott, Emer O’Flaherty a bhuaigh an comórtas náisiúnta agus idirnáisiúnta sa bhliain 2017 len a hamhrán “Taibhse” agus an ceoltóir agus amhránaí Fiach Ó Muircheartaigh. Mar is gnáthach beidh an ceoltóir agus léiritheoir Ollie Hennessy ina stiúrthóir ceoil ar an gcomórtas.  

Measfar na hamhráin ar fheabhas na bhfocal, an ceol agus an cur i láthair. Osclófar na doirse ag 7.30i.n. agus cuirfear tús le himeachtaí na hoíche ag 8i.n. Beidh fáilte roimh chách. Cead isteach €12 agus beidh ticéid ar fáil ag an doras.

IMRO agus Comhairle Chontae Ceatharlach atá ag déanamh urraíochta ar an gcomórtas náisiúnta i gcomhar le Gael Linn, Foras na Gaeilge, Pan Cheilteach agus Glór Cheatharlach. Bronnfar trí dhuais ar an oíche le €100 don tríú háit; €200 don dara háit; agus €1,000 móide an trófaí náisiúnta don chéad áit. 

Rachaidh an t-amhrán buacach ar aghaidh chun ionadaíocht a dhéanamh ar son na hÉireann ag an gComórtas Idirnáisiúnta i rith na Féile Idirnáisiúnta Pan Cheilteach a bheidh ar siúl i gCeatharlach um Cháisc. Beidh an t-amhrán in iomaíocht ansin leis na hamhráin náisiúnta nua-chuntha eile roghnaithe ag Alba, an Bhreatain Bheag, Oileán Mhanainn, an Choirn agus an Bhriotáin agus iad go léir ag súil le trófaí Pan Cheilteach 2023 agus príomhdhuais na féile €1,500 a thabhairt leo.  

Glór Cheatharlach atá ag eagrú an chomórtais náisiúnta. 

Is féidir tuilleadh eolais a fháil ó Bríde ar 087 2857048, Emma ar 085 1340047 nó seol rphost chuig pancelticcarlow@gmail.com 

*******************************

Na hIomaitheoirí

1. Amhrán / Song: “Taibhse” Cumadóir / Composer: Ann-Marie O’Connor (An Spidéal, Co. na Gaillimhe) Cur i láthair / Performed by: Ann-Marie O’Connor

2. Amhrán / Song: “Sean Phianta” Cumadóir / Composer: Ruairí Mac Con Iomaire (Ros a Mhíl, Co. na Gaillimhe) Cur i láthair / Performed by: Ruairí Mac Con Iomaire

3. Amhrán / Song: “Ceol na Mara” Cumadóir / Composer: Brí Carr. (Leitir Ceanainn, Co. Dhún na nGall) Cur i láthair / Performed by: An Chrannóg, Gaoth Dobhair

4. Amhrán / Song: “Fill ar an Iarthar” Cumadóir / Composer: Caitríona Lane. (Letterfrack, Co. na Gaillimhe) Cur i láthair / Performed by: Caitríona Lane

5. Amhrán / Song: “I gCónaí Ann” Cumadóir / Composer: Emma Ní Mhairtín. (Leitir Ceanainn, Co. Dhún nan Gall) Cur i láthair / Performed by: Emma Ní Mhairtín & Cairde

6. Amhrán / Song: “Ach Níl Fhios Agam”. (Cluain Dolcáin, Baile Átha Cliath) Cumadóir / Composer: Aidan Cranny, Damien Mac Gabhann, Aileen Treanor Cur i láthair / Performed by: Aidan Cranny, Damien Mac Gabhann, Aileen Treanor

7. Amhrán / Song: “Lorganna ar an nGealach” Cumadóir / Composer: Sarah Keane. (Muigheo) Cur i láthair / Performed by: Rowlette

8. Amhrán / Song: “Ag Imeacht” Cumadóir / Composer: Áine Durkin. (Bun Cranncha, Co. Dhún na nGall) Cur i láthair / Performed by: Domhnall Ó Braonáin le Bróna Ní Cheallacháin & Éadaoin Nic Dhonncha. 9. Amhrán / Song: “An Bád Scairdhéanta” Cumadóir / Composer: Mairéad Ní Chríodáin. (Corcaigh) Cur i láthair / Performed by: Mairéad Ní Chríodáin

10. Amhrán / Song: "Tonnta na mBréag” Cumadóir / Composer: Éanna Ó Casaide. (Burnchurch, Co. Chill Chainnigh) Cur i láthair / Performed by: Grúpa Burnchurch

11. Amhrán / Song: “Rince Brian” Cumadóir / Composer: Sharon Ní Chuilibín. (Béal an Átha, Co. Mhuigheo) Cur i láthair / Performed by: Sharon Ní Chuilibín

12. Amhrán / Song: “Cion Cairde” Cumadóir / Composer: Melíosa Breathnach & Clár Ní Dhuinn (Ceatharlach) Cur i láthair / Performed by: EnCóre

13. Amhrán / Song: “I Mo Lámha” Cumadóir/Composer: Naosan Moore & Max Steffens. (Muileann gCearr, Iarmhí) Cur i láthair/ Performed by: Naosan Moore & Max Steffens

14. Amhrán / Song: “Leon” Cumadóir / Composer: Sonny Casey (Béal an Daingin, Co. na Gaillimhe) Cur i láthair / Performed by: Sonny Casey

15. Amhrán / Song: “Is Mise do Chúis” Cumadóir/Composer: Brí Carr Caela Carr. (Leitir Ceanainn, Co. Dhun na nGall))

Cur i láthair / Performed by: Cairde le Chéile

16. Amhrán / Song: “Ó Neamh go Talamh” Cumadóir / Composer: Éabha Breathnach (An Cheathrú Rua, Co na Gaillimhe Cur i láthair / Performed by: Éabha Breathnach

Féile Pan Cheilteach 2023

Preas Eisiúint

Comórtas Amhrán Nua-Chumtha Pan Cheilteach 2023 seolta

Tar éis bhriseadh trí bliana de bharr na paindéime, tá sé fógartha ag Glór Cheatharlach go reachtáilfear an Comórtas Amhrán Nua-Chumtha Pan Cheilteach arís an bhliain seo chugainn agus cuirfear fáilte roimh iarratais. 

Is comórtas é seo chun amhrán a aimsiú le bheith san iomaíocht ar son na hÉireann ag Féile Idirnáisiúnta Pan Cheilteach ‘23. Ní foláir na hiarratais a bheith as Gaeilge agus is gá na focail maraon leis an gceol a bheith nua chumtha. 

An t-amhrán ‘Mar a Bhíonn’ scríofa ag Áine Durkin agus curtha i láthair ag an amhránaí Gráinne Ní Fhátharta a bhuaigh an comórtas náisiúnta nuair a reachtáileadh é cheana sa bhliain 2020.

Cuirtear fáilte roimh gach stíl amhráin don chomórtas áirithe seo idir amhráin traidisiúnta, pop amhráin, amhráin tíre, rac, snagcheol agus eile. Ní foláir iarratais ar cd nó mp3 a bheith istigh faoi 5i.n. Dé Máirt, 20ú lá de Mhí na Nollag 2022. Déanfar gearrliosta de na hiarratais agus beidh na hamhráin a roghnófar le canadh beo ag an gComórtas Náisiúnta a bheidh ar siúl Dé Sathairn, 28ú Eanair 2023 in Amharclann GB Shaw, Ceatharlach.

‘Sé an ceoltóir Ollie Hennessy a bheidh ina stiúrthóir ceoil ar an gcomórtas agus beidh moltóirí aitheanta i láthair chun na hamhráin a mheas ar fheabhas na bhfocal, an cheoil agus an cur i láthair.

Déanfaidh IMRO i gcomhar le Gael Linn urraíocht ar an gcomórtas agus bronnfar duais €1,000 agus an trófaí náisiúnta ar an mbuaiteoir chomh maith leis an deis canadh ar son na hÉireann ag an gcomórtas idirnáisiúnta a bheidh ar siúl le linn na Féile Idirnáisiúnta Pan Cheilteach 2023 a bheidh ar siúl ón 11ú – 16ú Aibreán i gCeatharlach an Cháisc seo chugainn. Is ansin a bheidh an t-amhrán a roghnófar in iomaíocht leis na hamhráin nua-chumtha ag na tíortha ceilteacha eile ina measc Alba, an Bhreatain Bheag, Oileán Mhanann, an Chorn agus an Bhriotáin.

Tá sonraí uile an chomórtais agus foirmeacha iarratais ar fáil ar an suíomh gréasáin www.panceltic.ie. Is féidir tuilleadh eolais a fháil ó Ghlór Cheatharlach ar 087 2857048, 085 1340047 nó scríobh chuig  pancelticcarlow@gmail.com. Is feidir iarratais a sheoladh go leictreonach nó is féidir dlúthdhioscaí a chur sa phost chuig Comórtas Amhrán Pan Cheilteach, Glór Cheatharlach, Áras na nÓg, Éire Óg, Bóthar Uí Bhriain, Ceatharlach R93 Y020.

Féile Pan Cheilteach 2020 - An Gearrliosta

Tá an t-am sin den bhliain buailte linn, arís, a léitheoirí! Sea, is gearr uainn Féile Pan Cheilteach na bliana seo.

Mar is eol do chuid agaibh, bhain m'amhrán nuachumtha, Ní Thuigim, an comórtas amhránaíochta náisiúnta agus idirnáisiúnta, anuraidh, agus tá áthas orm a rá go bhfuil an leagan de Ní Thuigim, a casadh ag an bhféile idirnáisiúnta i Leitir Ceanainn, anuraidh, máistrithe go digiteach ag an gcoiste, agus le cloisteáil ar shuíomh na féile anseo - Daríona Nic Dhonncha á chasadh, Ciarán Tourish agus Ollie Hennessy á tionlacan. Go raibh céad míle maith agaibh uilig!

Seoladh comórtas amhránaíochta na bliana seo ar an gclár Ardtráthnóna ar Raidió na Gaeltachta, i Mí na Samhna, anuraidh, agus fógraíodh an gearrliosta, don chomórtas náisiúnta i gCeatharlach, ar an gclár céanna coicís ó shin - is féidir éisteacht le Bríde de Róiste, as Glór Cheatharlach, agus leis an láithreoir tacúil, Máirtín Tom Sheáinín, ag labhairt faoin ngearrliosta anseo, agus is féidir tuilleadh faoin gcomórtas a léamh, ar shuíomh IMRO, anseo.

Táim ag súil go mór leis an ócáid, arís i mbliana. Tá amhrán liom, Mar a Bhíonn, ar an ngearrliosta, agus Gráinne Ní Fhátharta as Baile na hAbhann á chasadh dom an geábh seo...go raibh maith agat, a Ghráinne!   

Go n-éirí go geal leis na hiomaitheoirí uilig. Táim ag súil go mór lena n-amhráin nuachumtha a chloisteáil, agus molaim iad as a gcuid cumadóireachta; is maith ann amhráin nua i nGaeilge, agus mo bhuíochas ó chroí leis na coistí uilig, agus leis na hurraitheoirí, a thugann an deis sin dúinne, cumadóirí agus amhránaithe na Gaeilge, amhráin nua chomhaimseartha a chur ar fáil, tríd an gcomórtas seo. 

Beidh an ócáid ar siúl anseo, in amharclann an VisualCarlow, i gCeatharlach, ar an 22 Feabhra, ag 7.30 i.n, agus is féidir ticéid don ócáid a cheannach ar an suíomh sin, anseo. 

An Gearrliosta

1. Meabh Ní Bheaglaoich – “Litir Ón Leanbh” (Ciarraí)
2. Matt McGinn – “Suaimhneas” (Co.an Dúin)
3. Dave Fadden & ‘Síol’ – “Sinsir” (Cluain Dolcáin)
4. Aidan Gene Cranny – “Imeacht Faoi Scáth” (Cluain Dolcáin)
5. Zoe Langsdale – “Tír Nua” (Stát Aontaithe agus Gaillimh)
6. Brighdín Carr – “Mo Ghuí” (Dún na nGall) le Diane Cannon & Hannah Nic Pháidín
7. Áine Durkin “Mar a Bhíonn” (Dún na nGall) le Gráinne Ní Fhátharta (Conamara, Co. na Gaillimhe)
8. Ciara Nic an Fhailí – “Liomsa Amháin” (Ceatharlach)
9. Diarmuid Mac Gabhann – “Cearúilín” (Cluain Dolcáin)
10. Gráinne Holland – “Mise & Tusa” (Co. an Dúin)
11. Damian Mac Gabhann – “Saol Símplí” (Cluain Dolcáin)
12. Clíona McDonald – “Shiúl Tú as Mo Shaol” (Co. Laoise)
13. Sonny Ní Cathasaigh “Áit ar an nGealach Lán” (Conamara, Co. na Gaillimhe)
14. Conor Bowman – “Grá Amháin Faoi Leith” (Dún Búinne, Co. na Mí)
15. Colm Mac Séalaigh – “1967” (Baile Átha Cliath)
16. Treasa Ní Cheannabháin – “Dóchas” (Conamara, Co na Gaillimhe)
17. Mairéad Ní Chríodáin-Ní Shé – “Bossa Nova Celtica” (Corcaigh)
18. Conor Mangan & Banna – “Brionglóidí (Dún na nGall)
19. Gaeltacht KK Banna – “Mistéir an Ghrá” (Cill Chainnigh)
20. Molly & Ella de Búrca – “Le Déanaí” (Cill Chainnigh)

Nod Ón Aineolach: Foclóirí Ar Líne

Is aoibhinn liom Oireachtas na Samhna, agus an chéad rud a dhéanaim, nuair a bhíonn ionad an Oireachtais bainte amach agam, ná ceannaím Clár Oifigiúil na Féile, le go mbeidh a fhios agam céard atá ag tarlú, cén áit ina mbeidh sé ag tarlú, agus cén t-am a mbeidh sé ag tarlú.

Leis an gclár, agus leis an aip iontach atá acu, táim in ann liosta na n-imeachtaí laethúla a fheiceáil, agus mo liosta laethúil féin a chruthú as na himeachtaí sin. Ar ndóigh, is minic imeachtaí suimiúla ag tarlú ag an am céanna, agus bíonn orm rogha a dhéanamh ach, ar a laghad, tá rogha agam, agus is fúm féin a bhíonn sé cén cosán a thógfaidh mé. Bíodh mé ceart nó mícheart faoi na roghanna a dhéanaim, is maith ann an tsaoirse sin, caithfidh mé a rá. 

Ceann de na himeachtaí is fearr liom, mar a thuigfeá, ná An Chúirt Filíochta, ach beidh tuilleadh uaim faoi ócáid na bliana 2017, amach anseo. Bhain mé an-sult as, mar is iondúil, agus fuair mé ardú croí ag éisteacht leis na dánta uilig, go háirithe ó na daoine óga atá ag teacht ar fhód na filíochta. 

I measc na n-ócáidí, bíonn ceardlanna agus cainteanna eolais. Mar aineolach, bím ag foghlaim liom, de shíor, agus ceann de na nithe nach raibh ar eolas agam, roimhe, d'fhoghlaim mé faoi ag an gcur i láthair, a d'eagraigh Foras na Gaeilge, faoi 'Úsáid foclóir.ie & teanglann.ie.' B'fhéidir go bhfuil an t-eolas seo agaibh cheana, a léitheoirí, ach, mura bhfuil, ceapaim go mbainfidh sibh leas as an méid a d'fhoghlaim mé féin.

Tá 'Uirlisí' ar fáil (breiseáin agus giuirléidí) 'chun rochtain thapa ar aistriúcháin Ghaeilge a éascú go díreach ó do bhrabhsálaí nó ó do leathanach gréasáin' agus cé nach bhfuil sé déanta agam ar an leathanach seo, fós, tá ceann acu ar shuíomh tuairisc.ie, agus táim den bharúil go mbainfear úsáid rialta as, ach duine bheith ar an eolas faoi,

                                                      Brú ar an bhfocal 'Foclóir'...

                                           ...tiocfaidh líne bán faoin bhfocal 'Foclóir'...

                                        ...brú ar fhocal sa téacs, nach dtuigeann tú...

                    ...aibhsítear an focal, agus gheobhann tú bosca anuas le míniúcháin!

Triúr a bhíonn ag obair ag na foclóirí, go bhfios dom; Cathal Convery, Cormac Breathnach agus Pádraic Mianáin, agus ní miste leo aon cheist faoina gcuid oibre, dúradh liom, ach í a sheoladh chuig aiseolas2@foclóir.ie. Fir chuidiúla chumasacha, feictear dom. Agus, mo bhuíochas le Foras na Gaeilge as na suímh iontacha seo a chur ar fáil dúinn. 

Is fiú, i mo thuairim, breathnú ar shuíomh s'acu ar YouTube, go háirithe ar an bhfíseán faoin 'Draoi Gramadaí' ... áiseanna iontacha iad uilig, don té atá ag foghlaim, fearacht an scríbhneora seo.

Mar a dúradh ar Chlár na Féile ag an Oireachtas, tá 'lántairbhe' le baint as na foclóirí ar líne, agus tá an t-aineolaí seo fíorbhuíoch d'fhoireann 'An tOireachtas' as na noda a chuireann siad ar fáil do mo leithéidí, chuile bhliain.