In Aois na hAibíochta?

Ó am go chéile, ritheann sé liom go bhfuilim ag dul anonn in aois. Amanntaí eile, bím den bharúil go mb'fhéidir go bhfuilim curtha soir, agus amach sna blianta, ag aimhréidh an tsaoil. 

Tá an saol de shíor ag athrú, mar is eol daoibh, a léitheoirí. Tá sé deacair cloigeann ná cos a choinneáil leis an gcraic uilig. Ach, déanaim iarracht bheith ar an eolas faoi chúrsaí an tsaoil, agus déanaim iarracht sibhse a choinneáil ar an eolas faoi na nithe sin nach bhfuil/raibh ar eolas agam. Déanaim é sin, ar fhaitíos na bhfaitíos go mbeadh aon duine agaibhse chomh haineolach liomsa, an dtuigeann sibh. 

Faraor, tá corr rud a sciorrann tharam, i ngan fhios dom.

Roinnt blianta ó shin - am nach raibh mé chomh gar sin do na trí scóir is atáim anois, ach am a raibh na páistí tógtha agam, agus deis agam suí ar mo sháimhín só i bpub i mBaile Átha Cliath, ag labhairt le duine nó dhó a cuireadh ar m'aithne tríd an mblag seo - bhí, ahem, deoch nó dhó ólta agam, agus sheol mé féinpic chuig m'iníon, An Bhean Neamhspleách, bean a bhí ag cur fúithi i Londain ag an am. 

'You look like Gollum!' 

...an téacs a sheol sí ar ais chugam. Rinne me googláil ar 'Gollum images' go bhfeicfinn cén sórt boicín é an Gollum seo, boc nach raibh ar m'aithne agam. Nuair a chonaic mé mo leathchúpla, d'inis mé scéal na dtéacsanna don lucht dí i mo chomhluadar. 

'Ba chuma liom...' arsa mé fhéin leo, '...ach níl aon aithne a'msa ar Ghollum, mar nach bhfaca mé Star Wars riamh i mo shaol!'

Tá siad fós ag gáirí fúm. Rinne mé tuilleadh googlála ar an ábhar ina dhiaidh sin, mar a thuigfeá. Níl Star Wars feicthe fós agam. Ná Lord of the Rings. Aiféala orm faoi sin, a lucht Sci-Fi!

Ar maidin, chonaic mé tvúit ó Aonghus, thall ar Twitter,

'Ná bac le mac a' Wookie is ní bhacfaidh mac a' Wookie leat...' a bhí cumtha aige. 

Ar fhaitíos na bhfaitíos gur chaill sibh an scéal, a léitheoirí, rinne mé googláil ar Wookie, ar ár son. Mar eolas daoibh, tá ní darbh ainm Chewbacca ina Wookie... tá, ahem, seisean in Star Wars, freisin, is cosúil.  

Is ait an mac an saol, ach táim ag foghlaim liom. Anois, ná bíodh sé le rá ag aon duine agaibh, a léitheoirí, nach bhfuilim do bhur gcoinneáil ar an eolas faoi, ahem, nithe tábhachtacha an tsaoil.

Cearc Ar Gor

Tháinig an chearc thuas chugam sa phost an tseachtain seo caite, mar bhronntanas ón Bhean Neamhspleách, do Lá na Máithreacha. Tá an chearc ag breith léi ó shin, agus táim, ahem, ar gor ag fanacht leis na huibheacha uaithi, Domhnach na Cásca.

Tháinig sí, sa phost, i mbosca, agus bhí go leor páipéir dhoinn timpeall uirthi, le hí a choinneáil sábháilte, is dócha. Cibé scéal é, thosaigh mé ag baint an pháipéir den bhosca le cúram, le nach stróicfinn é, le go mbeinn in ann an páipéar donn a chur i dtaisce, an dtuigeann sibh, le go mbeinn in ann é a úsáid arís, am éigin amach anseo.

Rith an smaoineamh liom, agus mé á dhéanamh sin, an sean-nós é páipéar, prócaí suibhe, seanntuáillí, boscaí folmha srl., a shábháil, agus a chur i dtaisce, le go mbainfear feidhm eile astú arís, nó an é go gceannaítear chuile ní as an nua sa lá atá inniu ann?

Inis Eoghain

Bhí cara m’iníne anseo ag an deireadh seachtaine, agus chinn mé féin agus an Garraíodóir beagán fámaireachta a dhéanamh leo, timpeall ar Inis Eoghain.

Tá Cnoc Fhathna ceithre mhíle soir ó Bhun Cranncha, agus is ann a thosaíomar an turas Dé Sathairn.

Sa ghrianghraf thuas, táim i mo sheasamh ar bharr an chnoic, amach os mo chomhair tá inbhear Loch Súilí, le Ráth Maoláin ar dheis, agus An Inis ar chlé.

Mar eolas daoibh, léigh mé go ‘síneann Loch Súilí 30km isteach ón gcósta thuaidh go Leitir Ceanainn agus is é is faide de roinnt góilíní sa tír a cruthaíodh leis an oighearaois.’

Sa ghrianghraf thuas, feictear an cabhsa atá ag dul trasna an inbhir, ó Fathain, ar chlé, go hInis, ar dheis. Sa chúlra, tá An Bheart agus, má mhéadaíonn tú an grianghraf, trí chliceáil air, feicfidh tú Grianán Ailigh ar bharr an chnocáin is airde ansin.

Chuamar ó thuaidh ansin, chuig An Dún Riabhach, áit a thóg mé an grianghraf thuas, ag Fort Dunree, nó ag An Dún Fhraoigh mar a thugtar air ar an suíomh sin. Feictear dom, ón taifead cartlainne ag logainm.ie anseo, go bhfuil an dá leagan den logainm, nó níos mó, ann.

Ar bharr na haille ansin, tá seanbhothán foraire, bothán atá an-ghar d’imeall na haille, mar a fheicfidh sibh. Is dóigh liom go raibh ar na saighdiúirí bheith iontach cúramach, agus iad ag siúl thart ar fud na haille sin fadó!

Suite ar a sáimhín só ar an aill, faoin mbothán, cois na farraige, bhí cuid d’éin na háite. Fulmairí, nó Cánóga Bána, is dóigh liom, atá iontu.

Is ionann ainm an fhulmaire, más fíor an méid a léigh mé anseo, agus ‘Foul Gull’ ó tharla é de nós acu ‘squirts contents of stomach at attackers.’ Ní raibh mé sách gar dóibh, a léitheoirí, le fianaise i leith an eolais sin a fháil daoibh. 

Ar aghaidh linn chuig Baile Lifín, áit a stopamar ag an trá ann. Bhíodh níos mó ná leagan amháin den logainm Baile Lifín ann, dar leis an taifead cartlainne anseo; mar shampla, Baile Luibh Finn, Baile Leith Bheann, Baile Lia Finn, Baile Liathmhuine srl.

Seachas an páiste agus an madra ar an trá, tá Glaiséidí le feiceáil sa chúlra, áit a dtugtaí Seale Island air tráth den saol. Tá ‘green garment’ mar aistriúchán ar an logainm sa taifead cartlainne ag logainm.ie, agus tá ‘Island of the Green Cloak’ mar aistriúchán ag Wikipedia.

Chuig Cionn Mhálanna linn ansin, áit ina bhfuil Banba’s Crown, an pointe is faide ó thuaidh in Éirinn, le fáil.

Nuair a bhíonn lá bán ann, is féidir oileáin Diúra agus Íle na hAlban a fheiceáil ón áit seo. Cibé sórt lá a bhíonn ann, tá neart eile le feiceáil timpeall na háite áille seo.

Radharc i dtreo an Atlantaigh Thuaidh, grianghraf a thóg mé ón seanbhóthán foraire, atá taobh leis an túr ar Banba’s Crown.