An Chúirt Filíochta - Oireachtas na Samhna 2023

Mar a tharla anuraidh, agus neart blianta eile, fiú i 2020 agus i 2021 i rith aimsir Chovid nuair a chuala muid na filí ag aithris ar líne, beidh An Chúirt Filíochta ar ais linn arís i mbliana ag Oireachtas na Samhna. Beidh an Chúirt ar siúl an geábh seo i Seomra Park in Óstán an mBrehon i gCill Airne, ag 1.30i.n. ar an Satharn, 4 Samhain. 

Tá'n Barántas (féach thíos) agus liosta de 'Deasghnátha na Cúirte' faighte agam ón Sirriam gníomhach é fhéin, Proinsias Mac a'Bhaird, an fear a ólann eagraíonn gach rud lá na cúirte. Molaim daoibh na deasghnátha a léamh go cúramach, le deis a thabhairt daoibh fhéin na 'seanfháinní óir' sin a bhailiú, ahem, ar fhaitíos go dteastóidís ar an lá. 

Idir an dá linn, iarrtar oraibh dán amháin (nó dhá dhán ghairide) a sheoladh chuig an sirriam gníomhach ag pmacabhaird ag gmail ponc com, roimh an Déardaoin, 2 Samhain, le bhur dtoil, le go mbeidh deis aige na socruithe teicneolaíochta a dhéanamh. 

Mar is iondúil, cuirtear fáilte roimh lucht aithrise agus lucht éisteachta. Is ócáid shóisialta neamhfhoirmiúil a bhíonn ann, agus a fhad is go gcloíonn chuile dhuine leis na deasghnátha (féach thíos), beidh sé ina raic chraic. Má bhíonn fonn ort dán a scríobh ná a aithris, ní gá cloí le téama na cúirte; tá seans ann go bhfaighidh tú an braon uisce beatha, roinnt duilisc agus snaoisín, pé scéal é. Mar sin fhéin, ná déan dearmad euro dán nó dhó a thabhairt do Phroinsias, roimh ré. 

Bígí ag cumadh, a chairde na filíochta! Agus, ná déan dearmad an scéal a scaipeadh, le bhur dtoil. 

                                ******************************

Barántas

Do Bhaird, Filí agus Ollaimh Bhanbha, beannachtaí!

Whereas, tá aird Chlanna Gael ar chraoltóirí a cuireadh ar ceal cheal chúram ceilte airgid agus an mhórchuid ag caoineadh chliseadh a ruagairí rugbaí sa Fhrainc. 

Be it known, go bhfuil daoine á ndíothú i gCríoch Chanán agus na mílte ar a dteitheadh, go bhfuil fáithe na linne seo ag trasnaíl ar a chéile lena dteachtaireachtaí a chuireann idir fhearg, imní agus amhras ar lucht a n-éisteachta agus go bhfuil neamhshuim an phobail i dtaobh na timpeallachta ina bhagairt sheasta dúinn ar fad. 

Whereas, ó chéadtharraing Aimhirgin críoch na Fódla chuige lena amhrán agus ó chéadmharaigh Finnéagas bradán agus é ar thóir an fheasa, bhí sé d’uchtach ag Éigse Éireann fáistine a dhéanamh, eolas a chuartú agus breithiúnas caoin a thabhairt. Cén eagna anois a roinnfidh sí ar chine Oileán na bhFionn? 

Ordaítear duit, subpoena ad testificum, fianaise a thabhairt os comhair Cúirte a eagrófar ar an tSatharn, an ceathrú lá de mhí na Samhna i gCill Airne ag 1.30 pm, maidir le fealltóirí, fáithe agus fírinne.  

Tugtha faoi mo lámhsa [le húdarás incheistithe] ar an lá seo, an cúigiú lá dhéag de Dheireadh Fómhair, Bliain ár dTiarna Dhá Mhíle Fiche a Trí.           

 

                                                                        PROINSIAS MAC A’ BHAIRD

                                                                                         Sirriam gníomhach

God Save The King! 

                          **********************************

Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaítear aire rialtais ar bhealach nuálach turgnamhach]. 

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar an ceadúnas teilifíse, Patrick Kielty ná cinsireacht ar Mastodon ina thubaiste phearsanta nó náisiúnta.

Bronnfar dram uisce beatha, crág duilisc agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard.

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig, Gaelg, Gaelscoilis, Yola, Shelta agus Gaolainn Iarthar Dhuibhneach. 

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh sé de chead ag an ghiúiré a gcuid seanfháinní óir a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith nó i ndiaidh imeachtaí na Cúirte agus ní fhéachfar air seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Seachnaítear na mionghléasanna agus an Hip Hop.

Ceadaítear don ghiúiré tuilleadh rialacha a chur leis an liosta seo agus nósanna nua a bhunú gan choinne. 

An Chúirt Filíochta - Oireachtas na Samhna 2022

Ardaíonn mo chroí chuile mhaidin ó chuala mé go bhfuil Oireachtas na Samhna ar ais linn, beo beathach as Cill Airne, arís i mbliana. D'airigh mé uaim an ócáid bhliantúil, an teacht le chéile sin a thugann deis dúinne, lucht labhartha na Gaeilge, ár dtraidisiún a roinnt lena chéile; mar lucht féachana, mar lucht éisteachta, mar lucht siamsaíochta. 

Cé go raibh teacht ar an gCúirt Filíochta ar líne anuraidh agus arú anuraidh, a bhuí leis na filí uilig a chuir a gcuid filíochta ar fáil go fial flaithiúil, agus a bhuí le Proinsias Mac a'Bhaird, Sirriam gníomhach na Cúirte a rinne obair na gcapall ar na físeáin, beidh sé go deas bheith ar ais in bhur gcuideachta, arís, an mhí seo chugainn, Dé Sathairn, 5 Samhain, 1.30 i.n. i Seomra Park, in Óstán an Brehon i gCill Airne. 

Tá Barántas agus Deasghnátha na Cúirte seolta ag an Sirriam gníomhach ildánach gnóthach cantalach cumasach (féach thíos) agus cé nach gá cloí le téama an bharántais, iarrtar oraibh dán amháin (nó dhá dhán ghairide) a sheoladh chuige ag pmacabhaird ag gmail ponc com, roimh an 3 Samhain, le bhur dtoil, le go mbeidh deis aige na socruithe teicneolaíochta a dhéanamh - cuireann sé na dánta le chéile ar scáileán, le hosteilgeoir, le go mbeidh deis ag an lucht éisteachta an dán a fheiceáil le linn aithris an fhile. 

Is ócáid shóisialta í agus cuirtear fáilte roimh bhur gcuideachta, bíodh sibh ag léamh linn, nó ag éisteacht linn. Beidh mise agus Bríd Ní Mhóráin i láthair, mar mhná tí, le súil a choinneáil oraibh le cuidiú le Proinsias, agus iarrtar oraibh, mura miste libh, an scéal seo a scaipeadh ar bhur lucht aitheantais. 

Is breá leis an Sirriam filí úra agus filí óga a fheiceáil ag teacht inár gcuideachta ag an gCúirt Filíochta, agus molaim daoibh neart acu a aimsiú, más féidir libh, ar fhaitíos go mbeadh orm fhéin, ar Bhríd agus ar Phroinsias an dram uisce beatha, pins snaoisín agus crág duilisc (luach saothair gach file a léann dán ag an ócáid) a ídiú muid fhéin. 

***********************

Barántas

Do Bhaird, Filí agus Ollaimh Bhanbha, beannachtaí!

Whereas, níor luaithe támh agus teidhm curtha ina ndiaidh ag maca Mhíle ná go bhfágtar fuar ina dtithe agus crom faoi ualach fiach iad.

Be it known, go bhfuil cogadh ag réabadh san Oirthear agus a anáil le brath ar chládaigh Éireann, go bhfuil sparáin folamh agus éadóchas ar dhaoine - tuirtheacht ba mhinic tráchta. Ach bíodh is go bhfuil foscadh gann, tá fine Inis Fáil i ndiaidh fáilte agus féile a chur roimh na sluaite anoir, rud ba chlú don chine Ghael ó aimsir ársa.

Whereas, ba nós ag an éigse sólás a thabhairt d’fhlatha agus tuatha na tíre a spreagadh, cén fhortacht a thabharfaidh filí Fódhla do mhacra Oileán na bhFionn, cén eagna a roinnfidh siad ar iníonra Inis Ealga?

Ordaítear duit, subpoena ad testificum, fianaise a thabhairt os comhair Cúirte a eagrófar ar an tSatharn, an cúigiú lá de mhí na Samhna i gCill Airne ag 1.30 pm, maidir le cogaíocht, cuairteoirí agus cruatan.  

Tugtha faoi mo lámhsa [le húdarás incheistithe] ar an lá seo, an séú lá de Dheireadh Fómhair, Bliain ár dTiarna Dhá Mhíle Fiche a Dó. 

 

                                                     PROINSIAS MAC A’ BHAIRD

                                                                         Sirriam gníomhach

God Save The King!

 

 *********************

Deasghnátha na Cúirte 

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaítear aire rialtais ar bhealach nuálach turgnamhach].

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar pleananna teanga, Kneecap ná dul ar scor Mháirtín Tom Sheáinín ina thubaiste phearsanta nó náisiúnta.

Bronnfar dram uisce beatha, crág duilisc agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard.

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig, Gaelg, Gaelscoilis, Yola, Shelta agus Gaolainn Iarthar Dhuibhneach.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh sé de chead ag an ghiúiré a gcuid seanfháinní óir a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith nó i ndiaidh imeachtaí na Cúirte agus ní fhéachfar air seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Seachnaítear na mionghléasanna agus an Hip Hop.

Ceadaítear don ghiúiré tuilleadh rialacha a chur leis an liosta seo agus nósanna nua a bhunú gan choinne. 

An Chúirt Filíochta - Oireachtas na Samhna 2021

Mar a tharla anuraidh, beidh An Chúirt Filíochta á seoladh go fíorúil i mbliana. Tá barántas na bliana seo (féach thíos) seolta ag an Sirriamh Gníomhach uasal, Proinsias Mac a'Bhaird, agus beidh mé féin agus Bríd Ní Mhóráin ag coinneáil súil ghéar air, ar fhaitíos go bhfágfaidh sé muide aon rud ar lár. 

Arís i mbliana, is físeáin atá uainn, a chairde, le go mbeidh An Chúirt Filíochta páirteach mar chuid d'Oireachtas fíorúil na Samhna seo. 29 file a ghlac páirt ann anuraidh, agus is féidir an físeán álainn sin, a chuir Proinsias le chéile, a fheiceáil anseo. 

Tá an Treoir Taifeadta ag bun na blagmhíre seo (féach thíos), agus is féidir bhur n-iarrachtaí a thaifead, agus an físeán a sheoladh, mar aon le téacs an dáin, chuig Proinsias ag pmacabhaird ag gmail ponc com, ar ríomhphost, ar WeTransfer, nó chuig WhatsApp uimhir (086)2318698. 

Iarrtar oraibh focail an dáin a sheoladh, a chairde, mar cuirfidh Proinsias fotheideal le do dhán, le go mbeidh an lucht féachana in ann focail an dáin a léamh agus a chloisteáil uait, ag an am céanna. 

Tá agaibh go dtí Luan, 4 Deireadh Fómhair - beidh obair theicniúil le déanamh ag Proinsias in am don seoladh fíorúil, agus is fearr na físeáin a bheith aige faoin dáta sin, mura miste libh. Dán amháin (nó dhá dhán ghairide) atá ag teastáil, ach gan dul thar 3 nóiméad ar an bhfíseán, le bhur dtoil.

Táimid buíoch de lucht Oireachtas na Samhna as an deis a thabhairt dúinn bheith páirteach san Oireachtas fíorúil, arís i mbliana - tá ardán domhanda á chur ar fáil acu le go mbeidh deis ag filí na tíre seo filíocht na Gaeilge a cheiliúradh arís.

Seo chugaibh Barántas na bliana seo,

                                                                 Barántas

Do Bhaird, Filí agus Ollaimh Bhanbha, beannachtaí!

Whereas, tá sé de nós ársa ag éigse Éireann, olagón géar a dhéanamh faoi dhroch-chás Inis Eagla [sic], bhí sé de chlú aici riamh anall, in am an ghátair, port níos dóchasaí a sheinnt do phatrún fial.

Be it known, go bhfuil an ghrian ag éirí an athuair ar chlár na nGael, dóchas faichilleach le brath i measc maca Mhíle go bhfuil an phlá réabtha ag dul in éag. Caoineofar a bhfuil ar lár ach breathnófar chun cinn le súile úra. Ach an mairfidh ár ndóchas i bhfad nó an mbáfar é faoi thonn iombháite? Cén dóchas atá acu siúd ar cás leo aer agus farraigí an domhain nó a bhfuil cúram acu dár ndeirfiúracha i mbrá sna críocha thoir?

Whereas, tá saol úr le cruthú againn nó, ar a laghad, seansaol le hathshamhlú againn, cén treoir, spreagadh agus misneach a thabharfaidh filí Fódhla do na cluasa a éistfear leo?

Ordaítear duit mar sin, subpoena ad testificum, fianaise a thabhairt do Chúirt a eagrófar tráth na Samhna, le solas a chaitheamh ar an todhchaí, ar an timpeallacht agus ar ghrúpaí Taliban sa bhaile is i gcéin.  

Tugtha faoi mo lámhsa [le húdarás incheistithe] ar an lá seo, an tríú lá dhéag de mhí Mheán Fómhair, Bliain ár dTiarna Dhá Mhíle Fiche is a hAon.         

 

                                                     PROINSIAS MAC A’ BHAIRD

                                                                         Sirriam gníomhach

 God Save The King!

 *****************

 TREOIR TAIFEADTA d’FHÍSEÁN OIREACHTAS NA SAMHNA 2021

Aimsigh do Shuíomh Taifeadta:

Bí airdeallach maidir leis an spás agus leis an gcúlra a roghnóidh tú mar gur ionann an fhíseán a thaispeáint go poiblí agus cuireadh a thabhairt d’aíonna isteach sa spás sin;

Cinntigh go mbeidh tú ar do chompord agus go mbeidh gach ní a bheidh ag teastáil uait in aice láimhe agat sula dtosóidh tú;

Déan tástáil roimh ré lena chinntiú go bhfuil dóthain solais sa spás le go mbeidh tú le feiceáil go soiléir.

An Suíomh Taifeadta:

Déan cinnte go bhfuil tú i seomra ciúin in áit nach mbeidh:

 Fothram ar bith;

 Macalla ar bith; ná

 Aon innill leictreonacha ar siúl sa chúlra. 

Fearas atá molta:

 Fón Póca nó Ipad le ceamara ar ardchaighdeán;

 Seastán tríchosach beag (mura bhfuil an trealamh seo agat, socraigh suas an fón póca nó

an ipad ar dhromchla mín, cothrom, os do chomhair amach agus daingnigh ansin é ionas

nach mbeidh aon bhaol go dtitfidh sé nó go mbeidh sé ag luascadh.)

An Taifead:

 Ar do cheamara, roghnaigh an socrú le haghaidh íomhá tírdhreacha (ar mhóramh na bhfearas níl le déanamh ach an fearas féin a iompú ar a thaobh;

 Socraigh tú féin os comhair an cheamara ionas go mbeidh tú le feiceáil ó do bhásta aníos go barr do chloiginn, ach fág neart spáis thar timpeall ort féin;

 Bí chomh nádúrtha agus is féidir leat ach b’fhearr gan an iomarca útamála ná bogadh thart a dhéanamh le linn an taifeadta.

 Bíodh do script réidh agat!

Nuair a bheidh an fhíseán críochnaithe agat:

 Sábháil an fhíseán; agus

 Seol é chuig an duine cuí ar WhatsApp, Ríomhphost nó WeTransfer.

Beidh Louise Ní Dháibhéid (louise@antoireachtas.ie) ar fáil le comhairle a chur ort má bhíonn aon cheist agat.

An Chúirt Filíochta Fhíorúil - Oireachtas na Samhna 2020

Mar is eol daoibh, a léitheoirí, ón méid a scríobh mé anseo, an mhí seo caite, ní bheidh muid ag teacht le chéile don Chúirt Filíochta, mar is iondúil linn, ag Oireachtas na Samhna, ach, mar sin féin, beidh muid ag teacht le chéile d'Oireachtas na Samhna ar bhealach eile...ar bhealach fíorúil.

Dé Sathairn seo chugainn, 31 Deireadh Fómhair, beidh sibh uilig in ann bhur n-aghaidh a thabhairt ar shuíomh an Oireachtais, anseo, ag meán lae, áit a mbeidh físeán de shaothar 29 file le feiceáil, agus le cloisteáil, agaibh - físeán atá curtha le chéile go proifisiúnta, agus go hálainn, ag ár Sirriam Gníomhach féin, an fear uasal cumasach sin, Proinsias Mac a'Bhaird.  

Cé go mbíonn mé féin agus Bríd Ní Mhóráin lena thaobh, go hiondúil, ag an gCúirt Filíochta, ag tabhairt cúnaimh do Phroinsias, caithfidh mé a admháil gurb é Proinsias a rinne formhór na hoibre don Chúirt Filíochta Fhíorúil seo, agus tá an-jab go deo déanta aige. 

Tá i bhfad níos mó i gceist leis an bhfíseán ná 29 file ag aithris a gcuid dánta nuachumtha - tá radhairc agus ceol, agus línte filíochta ón sean-am, ceangailte leis na dánta nua, fite fuaite idir eatarthu; in ómós don am i láthair, in ómós don am a caitheadh. 

Chomh maith leis sin, tugtar ómós ar leith dár gcara, Joe Steve Ó Neachtain, a d'imigh uainn, ar shlí na fírinne, i mbliana. 

Ár mbuíochas d'fhoireann Oireachtas na Samhna as an deis seo a chur ar fáil dúinn filíocht na Gaeilge a chuir os comhair an tsaoil, agus ár mbuíochas d'Fhoras na Gaeilge as a gcuid tacaíochta, i gcónaí, agus as a gcuid urraíochta. 

Is ar scáth a chéile a mhaireann muid. 

An Chúirt Filíochta - Oireachtas na Samhna 2020

Mar is eol daoibh, a léitheoirí, is ócáid bhliantúil í An Chúirt Filíochta ag Oireachtas na Samhna. Is é Proinsias Mac a'Bhaird eagarthóir na hócáide, agus bíonn mé féin agus Bríd Ní Mhóráin mar mhná tí aige. 

Go hiondúil.  

Ach, níl tada 'iondúil' faoin mbliain seo, faraor. Mar sin féin, d'iarr lucht an Oireachtais ar Phroinsias ar mhiste leis cúirt fhíorúil a chur ar fáil d'fhilí na tíre agus, i bhfaiteadh na súl, nár ghléas sé é féin i gclóca an tsirriam ghníomhaigh, agus sheol sé barántas na bliana seo chugainn. (Féach thíos)

Mar sin, a chairde, is físeáin atá uainn, i mbliana. Iarrtar oraibh bhur n-iarrachtaí a thaifeadadh (fón póca, táibléad, nó eile), agus an físeán, mar aon le téacs an dáin, a sheoladh chuig Proinsias ag pmacabhaird ag gmail ponc com, nó chuig WhatsApp uimhir (086)2318698, roimh an Luan, 28 Meán Fómhair, le bhur dtoil. 

Ní gá cloí le téarma an bharántais (is féidir leat dán duine eile a aithris nó a cheol, más mian leat) ach iarrtar ort gan dul thar trí nóiméad - beidh go leor obair theicniúil i gceist, mar a thuigfeá, agus tá súil ag Proinsias físeán mór amháin (40/50 nóiméad) a chur le chéile (le fotheidil fhocal an dáin curtha le físeán an fhile aonair) réidh le seoladh chuig Oireachtas na Gaeilge, le deis a thabhairt dóibh an físeán a chraoladh mar chuid den Oireachtas fíorúil. 

Tá Treoir Taifeadta d'fhíseán le léamh ag bun an leathanaigh seo, a bhuí le hOireachtas na Samhna. 

Mar sin, a chairde, tapaígí an deis! Seans iontach atá anseo litríocht agus filíocht na Gaeilge a thaispeáint go forleathan, ar fud an domhain. Is fearr go fíorúil ná go brách. Go n-éirí go geal le bhur n-iarrachtaí! Seo chugaibh Barántas na bliana seo,

Barántas

Do Bhaird, Filí agus Ollaimh Bhanbha, beannachtaí!

Whereas, is dual d’éigse na hÉireann ceol a chumadh faoi éachtaí chine na nGael, faoi na hoilbhéimeanna a bhaineann dó agus, ó aimsir na dtaoiseach tréan, fúthu siúd a d’imreodh tionchar ar bhánta Fódhla.

 Be it known, tá olagón agus caoineadh géar ag éirí i measc maca Míle agus galar ag réabadh ar bhlár Oileáin na bhFionn. Tá deireadh le spraoi na mban agus tá sult na bhfear in ísle brí, ní bhíonn i súgradh páistí ach cluichí ar líne. Tá ár dtaoisigh úra ag malartú cótaí a fhad is atá cnámha Aoidh Ruaidh á nochtadh sa Spáinn agus tá an phéacóg bhuí san Oileán Úr ag glagaireacht leis i dtólamh.

 Whereas, tá an saol ina roithleán agus cinnteachtaí á gceistiú de shíor, cén iarracht a dhéanfaidh filí na hÉireann a cruth ceart a chur ar an fhírinne, tamhach táisc ár linne a chur i rann?

 Ordaítear duit mar sin, subpoena ad testificum, fianaise a thabhairt do Chúirt a eagrófar tráth na Samhna, le solas a chaitheamh ar ghalair, gearmansaíocht agus glórtha ar cheart dul in éag.

Tugtha faoi mo lámhsa [le húdarás incheistithe] ar an lá seo, an tríú lá de mhí Mheán Fómhair, Bliain ár dTiarna Dhá Mhíle agus a Fiche.

PROINSIAS MAC A’ BHAIRD 

Sirriam gníomhach

 God Save The King!

*************************************

TREOIR TAIFEADTA d’FHÍSEÁN OIREACHTAS NA SAMHNA 2020

Aimsigh do Shuíomh Taifeadta:

Bí airdeallach maidir leis an spás agus leis an gcúlra a roghnóidh tú mar gur ionann an fhíseán a thaispeáint go poiblí agus cuireadh a thabhairt d’aíonna isteach sa spás sin; Cinntigh go mbeidh tú ar do chompord agus go mbeidh gach ní a bheidh ag teastáil uait in aice láimhe agat sula dtosóidh tú;

Déan tástáil roimh ré lena chinntiú go bhfuil dóthain solais sa spás le go mbeidh tú le feiceáil go soiléir.

AN SUÍOMH TAIFEADTA

Déan cinnte go bhfuil tú i seomra ciúin in áit nach mbeidh:

 Fothram ar bith;

 Macalla ar bith; ná

 Aon innill leictreonacha ar siúl sa chúlra. 

CÉARD A BHEIDH AG TEASTÁIL CHUN AN FHÍSEÁN A THAIFEAD?

Fearas atá molta:

 Fón Póca nó Ipad le ceamara ar ardchaighdeán;

 Seastán tríchosach beag (mura bhfuil an trealamh seo agat, socraigh suas an fón póca nó an ipad ar dhromchla mín, cothrom, os do chomhair amach agus daingnigh ansin é ionas nach mbeidh aon bhaol go dtitfidh sé nó go mbeidh sé ag luascadh.)

 AN TAIFEAD

 Ar do cheamara, roghnaigh an socrú le haghaidh íomhá tírdhreacha (ar mhóramh na bhfearas níl le déanamh ach an fearas féin a iompú ar a thaobh;

 Socraigh tú féin os comhair an cheamara ionas go mbeidh tú le feiceáil ó do bhásta aníos go barr do chloiginn, ach fág neart spáis thar timpeall ort féin;

 Bí chomh nádúrtha agus is féidir leat ach b’fhearr gan an iomarca útamála ná bogadh thart a dhéanamh le linn an taifeadta.

 Bíodh do script réidh agat! Nuair a bheidh an fhíseán críochnaithe agat:

 Sábháil an fhíseán; agus

 Seol é chuig an duine cuí ar WhatsApp, Ríomhphost nó WeTransfer.

Beidh Louise Ní Dháibhéid (louise@antoireachtas.ie) ar fáil le comhairle a chur ort má bhíonn aon cheist agat.

An Chúirt Filíochta - Oireachtas na Samhna 2019

Barántas

Do Bhaird, Filí agus Ollaimh Bhanbha, beannachtaí!

Whereas, le cuimhne na seacht sinsear, choinnigh filí Fódhla cuntas ar stair, seanchas agus scéal Inse Fáil. Ó Thuath Dé Danann go teacht na nGael, ó Dhanair bharbartha go hansmacht na nGall, rinneadh tuairisc agus caitheadh géarshúil ar na cora iomadúla a cuireadh i gcinniúint Oileán na bhFionn.

Be it known, go bhfuil Cymru, Alba, Éire agus Dúiche na Sacsanach fágtha in umar na haimléise ag bréaga, bladar agus bolscairí beaga baotha, is gan radharc soiléir ag aon duine ar a bhfuil romhainn.

Whereas, tá an crú réidh le titim agus an tairne longadánach i dtólamh, cén dearcadh atá ag éigse Éireann ar a bhfuil ag tarlú is ar a mbeidh le teacht?

Ordaítear duit mar sin, subpoena ad testificum, a bheith i láthair ag Cúirt i dTeach Sagard a tionólfar ar an tSatharn, 2 Samhain ag 1.30 san iarnón, le do chuid fianaise a thabhairt i dtaobh trumpadóirí, treo agus todhchaí.

Tugtha faoi mo lámhsa [le húdarás incheistithe] ar an lá seo, an tríú lá dhéag de mhí Dheireadh Fómhair, Bliain ár dTiarna Dhá Mhíle agus a Naoi Déag.

PROINSIAS MAC A’ BHAIRD

Sirriam (Droch)ghníomhach

God Save The King!

**********

Tuilleadh eolais agus sonraí faoin gCúirt, san am a caitheamh, le léamh anseo (2018), agus anseo (2013-2017). 

Eolas faoi Oireachtas na Samhna 2019 le léamh anseo, agus sonraí faoi thicéid don Oireachtas anseo. Más mian leat clárú mar chara leis An Oireachtas, nó más mian leat síntiús a thabhairt, is féidir é sin a dhéanamh anseo. 

Tá sé, ahem, tábhachtach go léitear 'Deasghnátha na Cúirte' (féach thíos) le go mbeidh fílí na tíre, agus an lucht éisteachta, ar an eolas faoi na, ahem, rialacha a chumann Proinsias a bhaineann leis an gCúirt. 

Má tá sé ar intinn agat, a léitheoir, dán a léamh nó a aithris ag an gCúirt, bheadh Proinsias buíoch díot ach an dán/na dánta a sheoladh chuige, más mian leat, ag pmacabhaird ag gmail ponc com, roimh 31 Deireadh Fómhair, le go mbeidh seans aige iad a réiteach don scáileán mór. 

**********

Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla ann lá na Cúirte. 

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith sa tseomra cheart. 

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaítear aire rialtais ar bhealach nuálach turgnamhach]. 

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar tvuíteanna John Cleese, an Pop-Up Gaeltacht nó Imeacht Cois Life ina thubaiste phearsanta nó náisiúnta. 

Bronnfar dram uisce beatha, crág duilisce agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard. 

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig, Gaelg, Gaelscoilis, Yola, Shelta agus Gaeilge Thír Chonaill. 

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl]. 

Beidh sé de chead ag an ghiúiré finné a cheistiú. Muna bhfaightear freagra sásúil, beidh cead ag an ghiúiré a gcuid seanfháinní óir a chaitheamh ar an fhinné. 

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith agus leoga i ndiaidh imeachtaí na Cúirte agus ní fhéachfar air seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte. 

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Seachnaítear na mionghléasanna agus an Hip Hop. 

Beidh sé de chead ag an ghiúiré tuilleadh rialacha a chur leis an liosta seo agus nósanna nua a bhunú gan choinne.

Oireachtas na Samhna 2018 - An Chúirt Filíochta

Tá Barántas na bliana seo faighte agam ó Shirriam Gníomhach na Cúirte, Proinsias Mac a'Bhaird, agus d'iarr sé orm an cuireadh a chraobhscaoileadh 'i measc filí na hÉireann,' rud atá á dhéanamh agam, anois, leis an mblagmhír seo. 

(Nuair a thagann ordú le haghaidh pionta ón Sirriam Gníomhach, caithfear a mhian a chomhlíonadh, bíodh a fhios agaibh!) 

Tá téama na bliana seo luaite sa Bharántas, thíos, a chairde. 

Mar is iondúil, beidh Bríd Ní Mhóráin agus mé féin i láthair le smacht súil a choinneáil oraibh, agus ar fhaitíos nach bhfuil sibh cinnte faoi, ahem, rialacha na Cúirte, a bhuí leis an Sirriam (Droch)ghníomhach é féin, is féidir libh iad a léamh ag bun na blagmhíre seo, faoin teideal Deasghnátha na Cúirte. Moltar duit iad a léamh agus gan aird ar bith a bheith, ahem, iontach dáiríre fúthu. 

Beidh an Chúirt ar siúl Dé Sathairn, 3 Samhain, ag 1.30 i.n. i Seomra Inis Faithleann, Óstán an Gleneagle i gCill Áirne; ag Oireachtas Iontach na Samhna, mar is iondúil agus, a bhuí le hurraíocht ó Fhoras na Gaeilge, beidh gloine fíona agus greim beag le hithe ar fáil do na rannpháirtithe, théis an imeachta. 

Aon duine agaibh atá ag iarraidh a bheith páirteach sa Chúirt Filíochta i mbliana, bheadh an Sirriam Gníomhach buíoch díbh ach é sin a chur in iúl dó roimh 1 Samhain;  agus cibé dán/dánta atá agaibh le haithris, más mian libh é/iad a bheith le feiceáil ar an scáileán mór ag an ócáid, an bhféadfadh sibh cóip leictreonach den dán a sheoladh chuige, roimh ré le bhur dtoil, ag pmacabhaird ag gmail ponc com. 

(Tá an fear bocht ag dul anonn in aois, an dtuigeann sibh, agus is maith leis am a bheith aige le praiseach a dhéanamh de rudaí a réiteach mar is ceart. Bíonn sé an-chantalach an-chúramach faoin ócáid seo, bíodh a fhios agaibh, agus bíonn an-jab ag Bríd agus agam féin srian a choinneáil air nithe a choinneáil ag imeacht, mar ba mhiste leis.)  

Táimid ag súil go mór le bhur gcomhluadar, a chairde!

Barántas 

Do Bhaird, Filí agus Ollaimh Bhanbha, beannachtaí! 

Whereas, is fada éigse Éireann ag saothrú an tseanchais agus ag soirbhiú saíocht ár sinsear, chosain sí eagna leis na cianta cairbreacha, bhain tuiscint aisti agus chuir ar fáil go macánta do mhaca Mhíle í. 

Be it known, fríd Éirinn na gceithre mbeann gur dual d’fhilí Inis Fáil a nglórthaí a ardú le fírinne a scaoileadh ar Ghael agus ar ghallóglach araon, le guth gaoise a thabhairt dóibh siúd ar easpa glóir. 

Whereas, tá foscadh gann anocht in Oileán na bhFionn, tá luachanna Chlann Fhódhla mar a bhí ag titim in éagruth agus tá an tsaint agus an tuaigneas chun tosaigh an athuair. Cén glór a thabharfaidh éigse na linne seo dóibh siúd atá ar an taobh amuigh? 

Ordaítear duit mar sin subpoena ad testificum a bheith i láthair ag Cúirt i gCill Airne a tionólfar ar an tSatharn, 3 Samhain ag 1.30 san iarnón, le do chuid fianaise a thabhairt i dtaobh glórthaí, guthanna agus gealltanais. 

Tugtha faoi mo lámhsa [le húdarás incheistithe] ar an lá seo, an tríú lá dhéag de mhí Dheireadh Fómhair, Bliain ár dTiarna Dhá Mhíle agus a hOcht Déag. 

PROINSIAS MAC A’ BHAIRD 

Sirriam (Droch)ghníomhach 

God Save The King! 

Deasghnátha na Cúirte 

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla ann lá na Cúirte. 

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith gléasta go snasta, labhairt os ard agus a bheith sa tseomra cheart. 

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaíonn sé/sí aire rialtais ar bhealach nuálach turgnamhach]. 

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar a bhfuil i gceist le tubaiste. Ní aireofar bád Thoraí, an phleanáil teanga nó Dragons’ Den ina thubaiste phearsanta nó náisiúnta. 

Bronnfar dram uisce beatha, crág duilisce agus pins snaoisín ar gach finné a thugann fianaise shásúil. Bronnfar buidéal Cognac, caviar agus líne cócaoin ar fhinné a chuireann an giúiré ag gáire os ard. 

Ar iarratas i scríbhinn ó ⅔ den ghiúiré a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig na hAlban, Gaelscoilis, Yola, Shelta agus Gaeilge Thír Chonaill. 

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is a bhíonn gnó na Cúirte ar siúl]. 

Beidh sé de chead ag an ghiúiré finné a cheistiú. Muna bhfaightear freagra sásúil, beidh cead ag an ghiúiré cathaoireacha a chaitheamh ar an fhinné. 

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith agus leoga i ndiaidh imeachtaí na Cúirte agus ní fhéachfar ar seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte. 

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Seachnaítear na mionghléasanna agus an Hip Hop. 

Beidh sé de chead ag an ghiúiré tuilleadh rialacha a chur leis an liosta seo agus nósanna nua a bhunú gan choinne. 

Oireachtas na Samhna 2017 - An Chúirt Filíochta

Is ócáid bhliantúil í An Chúirt Filíochta ag Oireachtas na Samhna, agus tháinig Barántas na bliana seo chugam, chomh maith le mo chóip de, ahem, rialacha na cúirte, le déanaí. Tá siad le léamh, thíos, a chairde, le go mbeidh a fhios agaibh céard atá cearr i gceist leo. 

Más rud go bhfuil fonn ort peann a chur le pár. nó méar a leagan ar mhéarchlár, le dán a chumadh don ócáid, bheadh fear eagraithe na hócáide, agus Sirriam Gníomhach na Cúirte, Proinsias Mac A'Bhaird, breá sásta cóip leictreonach de do dhán (nó dhó) a fháil roimh an 2 Samhain, más mian leat do dhán(ta) a bheith le feiceáil ar an scáileán agus é/iad á aithris agat. 

Más mian, agus más féidir é, seol ríomphost chuige, le bhur ndánta, ag pmacabhaird ag gmail ponc com, roimh an dáta thuasluaite. Más mian leat téama a aimsiú do do dhán, tá rogha tugtha ag Proinsias duit, sa bharántas, ach ní gá cloí leis. 

Leagtar béim ar an taobh sóisialta den Chúirt, agus cuirtear fáilte roimh chuile dhuine, bíodh dán cumtha agat nó ná bíodh. 

Beidh sólaistí ar fáil, théis na Cúirte, agus beidh deis againn, ansin, bualadh le chéile (in áit a bheith ag bualadh a chéile, má thuigeann tú leat mé!) Ar ndóigh, ní féidir, riamh, bheith róchinnte céard a tharlóidh i rith na Cúirte, ach is féidir libh na, ahem, deasghnátha a léamh, thíos, le go dtuige sibh an chraic. I ndáiríre. 

A bhuí le Proinsias, agus le hurraíocht ó Foras na Gaeilge, agus le foireann chumasach An tOireachtas, beidh An Chúirt Filíochta ar siúl ag 1:00 i.n., Dé Sathairn, 4 Samhain, Seomra Inis Faithlinn in Óstán Gleneagle. 

Beidh mé féin agus Bríd Ní Mhóráin ansin, le smacht súil a choinneáil ar an gcraic uilig, ar fhaitíos na bhfaitíos go mbeadh an iomarca ólta ag tuirse ar an Sirriam (Ain)ghníomhach. 

                                           Barántas

Do Bhaird, Filí agus Ollaimh na hÉireann, beannachtaí!

Whereas, is fada éigse uasal Fódla ag muirniú an fhocail chothroim, ag santú an natha chaoin agus ag caomhnú friotal na fírinne, é de ghnás aici dúshlán bhodaigh na mbréag a thabhairt bíodh siad anseo in Achadh Airt nó sna críocha imigéin.

Be it known, nár umhlaigh baird Bhanbha riamh roimh chlaon, nár chloígh riamh le heasonóir ná feall, nár éalaigh riamh in aghaidh an éagóra.

Whereas, tá tormán bréan chugainn aniar, claonadh fírinne agus fíricí, corbadh an chirt agus maslú aineolach na macántachta, cén freagra a thabharfaidh filí Inis Ealga ar an táirbhéim bhrúidiúil bhroimnéiseach seo? Cén dúshlán a thabharfaidh siad ar an fhathach bhuí ina thúr eabhair?

Ordaítear duit mar sin subpoena ad testificum a bheith i láthair ag Cúirt i gCill Airne a tionólfar ar an tSatharn, 4 Samhain ag 1.00 san iarnón, chun do chuid fianaise a thabhairt i dtaobh fírinne, fíricí agus feall.

Tugtha faoi mo lámhsa [le huabhar domhaíte agus údarás incheistithe] ar an lá seo, an seachtú lá dhéag de mhí Dheireadh Fómhair, Bliain ár dTiarna Dhá Mhíle agus a Seacht Déag.   

                                                      PROINSIAS MAC A’ BHAIRD

                                                  Sirriam (Ain)ghníomhach

God Save The King!

 Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla ann lá na Cúirte.

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith gléasta go snasta, labhairt os ard agus a bheith sa tseomra cheart.

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaíonn sé/sí aire rialtais ar bhealach nuálach turgnamhach].

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar cad is tubaiste ann. Ní aireofar dúnadh an bheáir roimh a ceathair a chlog ar maidin nó ATM Bhanc na hÉireann ina thubaiste phearsanta nó náisiúnta.

Bronnfar dram uisce beatha, crág duilisce agus pins snaoisín ar gach finné a thugann fianaise shásúil. Déantar amhlaidh le deimhniú gur ócáid fhíorghaelach a bheidh ann agus ar eagla gur lig finné ar bith dá c(h)uid gaelachais sleamhnú i dtreo an ghalldachais. Cé nach gcuirfidh neamhGhaelachas bac ar fhinné fianaise a thabhairt, moltar d’fhinnéithe den tsórt seo ligean orthu féin gur fíorGhaeil de shliocht gaelach a bhíonn ag Gaeilgeoireacht ó mhaidin go hoíche iad.

Ar iarratas i scríbhinn ó ⅔ den ghiúire a fhaightear 6 mhí roimh dháta na Cúirte, cuirfear aistriúchán comhuaineach ar fáil sna teangacha seo a leanas: Ultais, Gàidhlig na hAlban, Gaelscoilis, Yola, Shelta agus Gaeilge Thír Chonaill.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is atá gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh cead ag an ghiúiré cathaoireacha a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith agus leoga i ndiaidh imeachtaí na Cúirte agus ní fhéachfar ar seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Seachnaítear na mionghléasanna agus an Hip Hop.

Beidh sé de chead ag an ghiúiré tuilleadh rialacha a chur leis an liosta seo agus nósanna nua a bhunú gan choinne.

Focail An Iarthuaiscirt...Comórtas Filíochta

Mar eolas daoibh, a léitheoirí, féach thíos na sonraí uilig faoin ócáid Comórtas Filíochta Gaeilge 2016 a bheidh ar siúl i Leitir Ceanainn, ag deireadh na míosa seo. 

Beidh na filí thíosluaite, atá ar an ngearrliosta, ag léamh a gcuid dánta dúinn, sula bhfógróidh an moltóir (bunaitheoir An Chúirt Filíochta), Proinsias Mac a'Bhaird, cé hé nó cé hí buaiteoir an chomórtais. 

Ina dhiaidh sin, beidh ceol traidisiúnta; agus mic oscailte ar fáil, más mian le haon duine agaibh bheith ann ar an oíche, agus bhur saothar fhéin a roinnt leis an lucht éisteachta.

Is mór ag an eagraíocht, Focail an Iarthuaiscirt/NorthWestWords, an chabhair mhór a thug tacaíocht airgeadais Údarás na Gaeltachta agus An Chomhairle Ealaíon, trí Ealaín na Gaeltachta, chun an togra seo a chur ar bun. 

Buíochas, freisin, le Uachtarlann Dhún na nGall as a gcuid urraíochta...beidh corn an chomhlachta á bhronnadh ar an mbuaiteoir, ar an oíche, chomh maith. 

Beidh mise ann, mar Bhean An Tí, agus táim ag súil go mór leis an oíche. Bígí linn, a chairde!

                           North West Words

Café Florence, Leitir Ceanainn  

An Déardaoin 30 Márta 2017 8.00pm

Comórtas filíochta Gaeilge 2016  

le Focail an Iarthuaiscirt, 

urraithe ag Ealaín na Gaeltachta 

agus Uachtarlann Dhún na nGall

An chéad duais: 250 euro agus corn (urraithe ag Uachtarlann  Dhún na nGall)

Moltóir an chomórtais:  Proinsias Mac a'Bhaird

Gearrliosta

An abairt ghearr - Sean O’Muireagáin, Béal Feirste

Bruach - Gearóid DeBriotún, Baile Átha Cliath

Admháil na hOíche Shathairn, Cúpla Lá Iardheireadh Caidrimh -

Dubhán Ó Longháin, Co. Dhún nan Gall

Gadaí na Geanmnaíochta - Michéal O Ruairc, Baile Átha Cliath

An Fidléir - Máire Dinny Wren, Co. Dhún nan Gall

Deasghnáth - Seosamh Ó Murchú, Baile Átha Cliath

An Chúirt Filíochta - Oireachtas na Samhna 2016

Cé nach mbeidh mé féin ann, faraor, ba mhaith liom a chur in iúl daoibh go mbeidh An Chúirt Filíochta ar siúl arís i mbliana, ag Oireachtas na Samhna in Óstán an Gleneagle i gCill Airne, ar an Satharn beag seo, 5 Samhain, ag 1:00 san iarnón. 

Tá Deasghnátha na Cúirte faighte agam, ó mo chara, Proinsias Mac a'Bhaird, eagraí agus, ahem, 'Sirriam Drochghníomhach' na cúirte, agus tá siad á roinnt agam libh, thíos, le deis a thabhairt daoibh iad a fhoghlaim go, ahem, glanmheabhair, sula rachaidh sibh in aice na cúirte. 

Tuilleadh eolais uaim faoin gcraic uilig a bhain leis an ócáid seo, le roinnt blianta anuas, le léamh anseo.

Bainígí sult as an ócáid, a chairde...aireoidh mé uaim sibh! 

Deasghnátha na Cúirte

Ní léifidh aon fhinné níos mó ná dhá dhán mar fhianaise, ach bíodh an tríú ceann réidh aici/aige ar eagla nach mbeidh rannpháirtíocht shásúil ó fhilí sásúla i láthair lá na Cúirte.

Ní gá don fhinné cloí le téama na Cúirte agus ní gá don fhinné dán dá c(h)uid féin a aithris ach iarrtar ar gach finné a bheith gléasta go snasta agus labhairt os ard.

Is nós don ghiúiré bualadh bos a thabhairt d’fhinné nuair a bheidh fianaise tugtha aige nó aici. Ní nós bualadh bos a thabhairt agus an finné i lár aithrise [ach amháin sa chás go maslaíonn sé/sí aire rialtais ar bhealach nuálach turgnamhach]. Fágtar faoi dhiscréid oifigigh na Cúirte é cé acu an dtabharfaí bualadh bos d’fhinné sula dtosaíonn sé/sí ag léamh!

Seachnaítear an caoineadh agus an t-olagón ach amháin sa chás go mbíonn tubaiste mhór náisiúnta nó pearsanta ann maidin na Cúirte. Beidh sé de dhualgas ar oifigigh na Cúirte sainmhíniú a dhéanamh ar cad is tubaiste ann. Ní aireofar Brexit, réiteoirí peile sa Ghaeltacht ná Tithe Tábhairne Chorcaí ina dtubaistí náisiúnta nó pearsanta.

Má théann finné ar bith ar aghaidh ró-fhada lena c(h)uid fianaise, bronnfar fadfhíseán d’óráidí Donald Trump air/uirthi.

Ceadaítear éirí in airde, éirí ar tháblaí agus éirí amach ach ní cheadaítear éirí suas ar bhaill eile den ghiúiré [a fhad is atá gnó na Cúirte ar siúl].

Beidh sé de chead ag an ghiúiré finné a cheistiú. Muna bhfaightear freagra sásúil, beidh cead ag an ghiúiré cathaoireacha a chaitheamh ar an fhinné.

Taispeántar an meas is dual d’oifigigh na Cúirte, agus beannaítear go cuirtéiseach leo. Tá cead ag finné deoch mheisciúil a cheannach d’aon oifigeach roimh, i rith agus leoga i ndiaidh imeachtaí na Cúirte agus ní fhéachfar ar seo mar bhreab. Ní gá d’oifigigh na Cúirte a bheith cáilithe in aon rud fónta, ach is gá dóibh a bheith beo agus fá scread asail de láthair na Cúirte.

Tá cead ag finné a c(h)uid fianaise a chanadh, ach ní mór glór ceolmhar binn a bheith aige/aici. Beidh sé de chead ag an ghiúiré tuilleadh rialacha a chur leis an liosta seo agus nósanna nua a bhunú gan choinne.