Fadó, Fadó, Fada...

Tá an cárta, thuas, le ceannach in Aldi faoi láthair, mar atá neart cártaí eile mar é, arb é Lá Fhéile Pádraig a dtéama.

Mar atá scríofa ar chúl an chárta, tá na cártaí uilig de dhéantús Éireannach faoi ráthaíocht, agus molaim a gcuid tacaíochta dár ngeilleagar. Cúpla bliain ó shin, cheannaigh mé cárta nó dhó eile in Aldi, agus bhain na teachtaireachtaí suimiúla, a bhí priontáilte ar na cártaí, gáire nó dhó as an dream thall.

Nuair a d'oscail mé an cárta thuas, i mbliana, baineadh siar asam. Meas tú, arsa mé féin liom féin, an é nach dtugann na 'totally Irish' daoine a dhéanann na cártaí, an é nach dtugann siad faoi deara go bhfuil rud nó dhó, nó trí, ar iarraidh ón mbeannacht?

Ah bhuel, gura, ahem, fada buan a gcuid iarrachtaí, mar sin féin. 

Amú San Aistriúchán?

Fada nó dhó ar iarraidh ón bhfógra seo, meas tú, fógra a chonaic mé anseo i mBun Cranncha le déanaí?  Ssiúráilte, bhfuil tú? 

Tuilleadh fógraí mar iad le feiceáil anseo, ar tuairisc.ie. 

Níl sé i gceist agam go gceapfadh sibh go bhfuilim ag caitheamh anuas ar an FSS, mar nílim, ach ní thuigim, ar chor ar bith, cén chaoi a dtarlaíonn botúin mar seo, nuair atá córas agus céatadán ar leith leagtha síos ag Foras na Gaeilge d'aistritheoirí, céatadán nár éirigh liom féin a fháil, fadó. 

An é go mbaineann comhlachtaí an stáit úsáid as aistritheoirí nach bhfuil ar liosta Fhoras na Gaeilge? 

Nó, meas tú an 'botún cló' atá i gceist? Hmmm...