As Baile Sa mBaile

I láthair na huaire, táim i gCeantar na nOileán, in áit nach bhfuil leathanbhanda ar fáil agam an t-am ar fad, mar sin maithigí dom mo mhoill ag teacht ar ais chugaibh, a léitheoirí. 

Bhí am an-deas againn i gCeatharlach, agus táim buíoch díbh uilig as na beannachtaí a sheol sibh chugainn, don amhrán Le Do Thaobh. Mo chuimhne, agus ó tharla gur cuireadh ceist orm faoi seo, tá leaganacha den amhrán le fáil ar Amazon MP3, Spotify agus iTunes, chomh fada agus is eol dom. Déan cuardach leis na focail 'Le Do Thaobh' agus tiocfaidh sibh air, seans. 

Mar atá le feiceáil agaibh ón scórchlár thuas, níor éirigh linn an chéad áit sa chomórtas amhránaíochta ag an bhFéile Idirnáisiúnta Pan Cheilteach a thabhairt linn, ach oíche ar dóigh a bhí ann, agus bhí na duaiseanna tuillte acu siúd a bhuaigh sa chomórtas sin agus, go deimhin, i chuile chomórtas i rith na féile – comhghairdeachas ó chroí leo uilig, agus le chuile dhuine a ghlac páirt sna comórtais a eagraíodh don fhéile.   

Ba mhaith liom mo bhuíochas a ghabháil le coistí na Féile chomh maith céanna, mar bhí clár iontach curtha le chéile acu, agus bhain mé sult nach beag as an méid a chonaic agus a chuala mé agus mé thíos ann.

Ní amháin sin, ach chaith an coiste áitiúil go hiontach liom am ar bith ar labhair mé leo ar an bhfón nó ag an bhféile; daoine uaisle cumasacha fáilteacha iad, daoine a dhéanann gach uile iarracht ar chultúir, ar theangacha agus ar thraidisiúin na gCeilteach a choinneáil beo beathach. Molaim go hard na spéire iad, agus tá áthas orm gur éirigh liom bualadh leo uilig i gCeatharlach.  

Mo chuimhne, bhí Ollie Hennessy, stiúrthóir an cheoil, agus a chomhghleacaithe, ag obair go dian i rith an ama, ag cinntiú go mbeadh an fhuaim agus an fhís mar ba chóir ar an stáitse, agus rinne siad jab iontach, caithfidh mé a rá – maith sibh, a fheara!

D’fhan mé sa Talbot Carlow, óstán atá i Co. Laois, creid é nó ná creid, agus bhí na hoibrithe ansin thar barr ar fad – Magda sa bhialann, Stephen sa bheár, agus Lisa ag an bhfáiltiú, na daoine ar leith a thug mé faoi deara ann. Cén fáth? Mar gheall ar an gcaoi ar chaith siad linn. Bhí siad cumasach agus cairdiúil, agus b'amhlaidh le hoibrithe na bialainne ann, ag an mbricfeasta, maidin lá arna mhárach.

Is cuma cén áit a dtéim, bíonn daoine sa chúlra ag obair go dian, agus bíonn comhghleacaithe acu a chaitheann go hiontach leis an bpobal. Ach, mar a thug mé faoi deara agus mé ag plé le hoibrí nó dhó i mBus Éireann an tseachtain seo caite, tá oibrithe ann a chaitheann go tuirsiúil cuma-liomach leis an bpobal, chomh maith céanna. Ach, ní raibh a leithéidí romham i gCeatharlach - maith sibh uilig, a chairde! 

Agus, go raibh céad míle maith agaibh. Beidh mé ar ais libh arís.

Le Do Thaobh Ar an mBóthar

Sea, tá mé féin agus Seoirse ar an mbóthar arís, an bheirt againn, agus ár gcomhluadar, ar ár mbealach chuig an 42ú Féile Idirnáisiúnta Pan Cheilteach i gCeatharlach, áit a mbeidh ár n-amhrán, Le Do Thaobh, ag seasamh an fhóid ar son na hÉireann, sa Chomórtas Amhrán Pan Cheilteach, ag 7.00 i.n. amárach, Déardaoin. 

Tá PDF de chlár na féile le fáil anseo agus, mar a fheicfidh sibh, tá clár iontach curtha le chéile ag coiste na féile, le ceiliúradh agus comóradh a dhéanamh ar chultúir, ar thraidisiúin agus ar theangacha na gCeilteach as An Bhriotáin, Éirinn, Albain, Corn na Breataine, An Bhreatain Bheag, agus An Mhanainn. Beidh ceol, damhsa, amhránaíocht, scéalaíocht, ceardlanna, ealaín, spórt, filíocht, cuideachta agus craic go leor ann. 

Táim ag súil go mór leis an gcraic uilig, a léitheoirí. Beidh mé ar ais libh ar ball beag. 

Comórtas na Sé Náisiún

Láithreoir na hócáide, Daithí Ó Sé

Ní dhéanfaidh mé scéal fada den dea-scéal, a léitheoirí, mar sin níl le rá agam libh anois ach go ndearna an t-amhránaí Seoirse Ó Dochartaigh, éacht oibre ag an gComórtas Náisiúnta Amhrán Pan Cheilteach i gCeatharlach oíche Déardaoin seo caite, agus bhain ár n-amhrán, Le Do Thaobh, an chéad duais sa chomórtas sin. Wúhúúúú!

 Seán Ó Sé, Daithí Ó Sé, David Wilkinson (IMRO), Mise Áine, Seoirse, Antoine Ó Coileáin (Gael Linn)

IMRO, i gcomhar le Gael Linn, a bhí i mbun urraíochta ar an gcomórtas, (go raibh céad MÍLE maith agaibh, a dhaoine uaisle!) agus b’iad Séan Ó Sé, Colm Mac Séalaigh agus Traic Ó Braonáin a bhí ar an bpainéal moltóireachta – mo bhuíochas ó chroí libhse, freisin, a fheara! Bhí jab iontach crua le déanamh acu, a léitheoirí, mar bhí caighdeán an-ard ag na hamhráin uilig, agus bheadh duais tuillte ag chuile amhrán beo acu, cheap mé féin. 

Cá raibh sibh, a Raidió na Gaeltachta agus TG4, am a raibh deis agaibh an tallann sin uilig a thaifeadadh? 

Daithí, Áine, Seoirse

Daithí Ó Sé a bhí ina fhear an tí. Níor casadh Daithí orm riamh roimhe, agus is fear iontach deas, dathúil cumasach é, a léitheoirí, caithfidh mé a rá - cé gur dóigh liom nach bhfuil bean ar bith atá á léamh seo anois nach raibh ar an eolas cheana faoin, ahem, dathúlacht sin. Ná fiafraigh díom cén comhrá a bhí agam leis, agus mé thuas ar an stáitse faoi agallamh aige, mar ní cuimhin liom! Tá fáth go dtugtar Rámhaille ar an mblag seo, an dtuigeann sibh.

Beidh mé féin agus Seoirse i gCeatharlach arís ar an 4ú Aibreán, am a mbeidh Seoirse, ar son na hÉireann, ag casadh Le Do Thaobh arís. Beidh an t-amhrán ag dul in iomaíocht leis na cúig náisiún Cheilteacha eile: An Mhanainn, Albain, An Bhriotáin, An Bhreatain Bheag agus Corn na Breataine; déanfar chuile iarracht ar an gcraobh ar leith sin a choinneáil sa tír seo, geallaim daoibh, a chairde.  

An méid sin ráite, guím gach rath ar na leaids a bheidh in iomaíocht sa gcraobh-eile-mór-le-rá inniu – Éire Abú!

Tuilleadh faoin bhFéile Pan Cheilteach le léamh anseo, a chairde, agus b’fhiú go mór súil a chaitheamh ar réimse leathan na n-imeachtaí a bheidh ar siúl ann, ón 2ú - 7ú Aibreán, mar tá clár iontach curtha le chéile ag na coistí dúthrachtacha. 

Feicfidh mé ann sibh!