Leathanach de Mo Shaol

Roinnt míonna ó shin, i Mí na Bealtaine, d'fhógair an Ray D'Arcy Show go raibh comórtas scríbhneoireachta á reáchtáil acu. D'iarr siad ag an lucht éisteachta cuimhní cinn a roinnt leis an gclár, i bhfoirm scéilín scríofa. 500 focal an t-uasmhéid a bhí ceadaithe. 

Fuair siad os cionn 2500 scéal. Fuair siad ceann uaimse. Bhí sé ar an ngearrliosta de scéalta a seoladh chuig na moltóirí Emer McLysaght, Donal Ryan, Emilie Pine, agus Eoin Colfer.

Cé nár bhain mé aon duais ar leith, nach mé a bhí sásta nuair a chuala mé go raibh mo scéalsa, agus 149 scéal eile ón gcomórtas, roghnaithe do leabhar nua, A Page from My Life, leabhar a bhí le seoladh le hairgead a bhailiú don charthanas LauraLynn. 

Is scéalta pearsanta iad, cuid acu a chuirfeadh duine ag gáire, cuid acu a chuirfeadh duine ag caoineadh, cuid acu a bhainfeadh geit as duine; scéalta suimiúla iad uilig, oscailt súl a bhí iontu uilig. 

Is féidir an leabhar a fháil ar líne anseo, más mian leat, nó is féidir leat é a ordú ó do shiopa leabhar áitiúil. Téann brabús an fhoilsitheora, Harper Collins Ireland, €3 ar a laghad, chuig an gcarthanas, LauraLynn. 

Tá an leabhar ag déanamh go maith, cheana féin, agus tá deis agaibh, más mian libh, vóta a chaitheamh don leabhar anseo, mar tá sé ar an ngearrliosta Best Irish-Published Book of the Year ag na An Post Irish Book Awards i mbliana - spriocdháta don vótáil 16 Samhain, mar sin tá dhá lá eile agaibh le vóta a chaitheamh. 

Is leabhar é a mholfainn mar bhronntanas Nollag, '...a timely reminder of the experiences and values that unite us, even as circumstances contrived to keep us apart.' 

Féile Liú Lúnasa - Slam Filíochta

Craoladh Féile Liú Lúnasa, ina hiomláine, ar líne, i mbliana, mar gheall ar na srianta, agus rinne eagarthóir na féile, Caoimhe Ní Chathail, agus an Chultúrlann, an-jab go deo. Is féidir leat theacht ar na himeachtaí uilig, mar ar craoladh iad beo, anseo, ar shuíomh Facebook na féile. 

Ocht nduine dhéag a bhí páirteach sa chomórtas Slam Filíochta, i mbliana, comórtas a reáchtáladh ar an 28 Lúnasa. Is féidir an seó iomlán a fheiceáil, arís, anseo. Bhí teachtaireachtaí suimiúla dá gcuid féin le roinnt ag na hiomaitheoirí uilig, agus bhain mé an-taitneamh as an gcraic - an chéad uair agam bheith páirteach i gceann acu, agus súil agam tabhairt faoi arís. 

Tá éagsúlacht, foghlaim agus fuinneamh ar leith, ag baint le slamfhilíocht, feictear dom. Is maith ann foghlaim agus fuinneamh, i mo thuairim, agus is aoibhinn liom éagsúlacht. Beidh mé ag faire amach do na hiomaitheoirí a bhí páirteach ann, i mbliana - teachtaireachtaí agus/nó smaointe suimiúla acu uilig, agus táim ag súil, go mór, le tuilleadh a chloisteáil uatha. 

Sinéad Álainn Ní Uallacháin a chuir tús leis an gcomórtas Slam Filíochta, agus is é Séamus Barra Ó Súilleabháin, moltóir an chomórtais, a chuir clabhsúr leis an Slam (ó chúl charr éigin, ceapaim, ach d'fhéadfadh sé gur scáileán glas a bhí in úsáid aige) nuair a d'fhógair sé ainmneacha na mbuaiteoirí, théis focal nó dhó a rá faoin gcomórtas, agus, ahem, fúm féin. Táim buíoch díot, a chara. 

Comhghairdeachas ó chroí leis na buaiteoirí! Seo chugaibh ainmneacha na hiomaitheoirí a ghlac páirt sa chomórtas, le cló níos duibhe ar ainmneacha na mbuaiteoirí,  

Sinéad Ní Thuamáin (buaiteoir an chomórtais) le cloisteáil anseo 

Áine Durkin (féach thíos - mise mé féin) 

Cian Ó Gríofa

Padaí de Bléine

Dáithí de Buitléir

Gearóidín Nic Cárthaigh

Seph Ní Mhealláin

Ita Fitzmahony

Sam Ó Fearraigh (an dara háit) le cloisteáil ag 15.42 nóiméad anseo.

Stiofáin Ó Briain

Seán Ó Dubhchon

Ciara Ní É (an triú háit) le cloisteáil ag 26.38 nóiméad anseo. 

Jill McMahon

Dónall Chaoimhín Mac Murchaidh

Maoilíosa Scott

Meadhbh Ní Eadhra

Emma Ní Chearúil

Dubhán Ó Longáin

     An Séantóir 

An Litir Sin Nár Scríobh Tú Riamh

Roinnt blianta ó shin, scríobh mé blagmhír (féach anseo) faoi chomórtas scríbhneoireachta a bhí eagraithe ag RTÉ1.  Clár John Murray a bhí ann. 

Scríobh mé, an t-am sin, gur dheas an rud é dá mbeadh dán nó dhó as Gaeilge curtha san áireamh. Le scéal gearr a dhéanamh de scéal a d'fhéadfainn, ahem, an iomarca fad a chur leis, thosaigh sibh ag scríobh, agus bhain duine de léitheoirí an bhlag seo, ar scríbhneoir cumasach í, gan dabht ar bith,  an duais don dán is fearr i nGaeilge. 

Soláthar agus éilimh, a chairde na Gaeilge. 

Anois, níl a fhios agam tada faoi rialacha na bliana seo, nó fiú más ann dóibh don chomórtas atá ar siúl ar chlár Ryan Tubridy ar RTÉ1 i láthair na huaire, The Letter You Never Wrote, (níor chuala mé aon litir i nGaeilge ar chlár na mbuaiteoirí, anuraidh, más buan mo chuimhne) ach, mar sin féin, bheinn féin den bharúil nach mbeadh dochar ar bith ann, a léitheoirí, peann a chur le pár, arís, agus anáil agus aitheantas a thabhairt dár dteanga dhúchasach féin. 

Níl anseo ach smaoineamh, ach más mian leat bheith páirteach, tá a fhios agam gur féidir litir a sheoladh chuig ryan@rte.ie nó chuig An Post Letter Writing Competition, The Ryan Tubridy Show, Donnybrook, Dublin 4. 

Más ríomhphost a sheolfas tú, mholfainn teideal an chomórtais a úsáid go dátheangach, b'fhéidir, ar fhaitíos na bhfaitíos...The Letter You Never Wrote/An Litir Nár Scríobh Tú Riamh. 

Níl ann ach smaoineamh...ach, má tá Daidí na Nollag in ann litreacha i nGaeilge a léamh, bhuel...

An Eorafís 2018

Táim ag scríobh faoin Eorafís le blianta beaga anuas, agus le fada, mar is léir daoibh, a léitheoirí. 

Is comórtas é a thaitníonn liom, agus ní miste liom céard a cheapann aon duine eile faoi, (mura suim leat an comórtas, a chara, ní gá duit an bhlagmhír seo a léamh) is maith liom éisteacht leis na hamhráin, agus roghnaím na cinn a thaitníonn liom féin.

Ar ndóigh, ní hionann mo roghasa agus rogha aon duine eile, agus is minic nach dtiteann mo rogha féin isteach le toradh na hoíche, ach bíodh sí maith nó olc, seo mo rogha de na hamhráin is mó a chuaigh i bhfeidhm orm, nuair a chuala mé iad, den chéad uair,

1.   Amhrán na Cipire
2.   Amhrán na hÉireann
3.   Amhrán na Liotuáine
4.   Amhrán na Gearmáine
5.   Amhrán na Fraince
6.   Amhrán na Danmhairge
7.   Amhrán na hIorua 
8.   Amhrán Iosrael 
9.  Amhrán na hOstaire
10. Amhrán na Spáinne
11. Amhrán Phoblacht na Seice 
12. Amhrán Phoblacht na hAlbáine 

Anois, cén ceann is fearr liom? Sin ceist mhaith. Is maith liom uimhir 1 (An Chipir) agus uimhir 2 (Éire), gan dabht, ach chuir mé dúil láithreach in uimhir 3 (An Liotuáin), in uimhir 4 (An Ghearmáin), in uimhir 6 (An Danmhairg), in uimhir 9 (An Ostair), agus in uimhir 12 (An Albáin).

Sin mo rogha.

Go n-éirí go geal le Ryan O'Shaughnessy, agus a chomhghleacaithe, anocht. Tá amhrán tarraingteach scríofa aige, agus is maith liom a mhana 'Love is Love!'...agus, go háirithe, is aoibhinn liom an taibhiú ardáin a mhol sé, taibhiú a thugann le fios don domhan mór gur tír í an tír seo a thuigeann an gá le tuiscint, agus le hinghlacthacht, agus le comhionannas.

Focail An Iarthuaiscirt...Comórtas Filíochta

Mar eolas daoibh, a léitheoirí, féach thíos na sonraí uilig faoin ócáid Comórtas Filíochta Gaeilge 2016 a bheidh ar siúl i Leitir Ceanainn, ag deireadh na míosa seo. 

Beidh na filí thíosluaite, atá ar an ngearrliosta, ag léamh a gcuid dánta dúinn, sula bhfógróidh an moltóir (bunaitheoir An Chúirt Filíochta), Proinsias Mac a'Bhaird, cé hé nó cé hí buaiteoir an chomórtais. 

Ina dhiaidh sin, beidh ceol traidisiúnta; agus mic oscailte ar fáil, más mian le haon duine agaibh bheith ann ar an oíche, agus bhur saothar fhéin a roinnt leis an lucht éisteachta.

Is mór ag an eagraíocht, Focail an Iarthuaiscirt/NorthWestWords, an chabhair mhór a thug tacaíocht airgeadais Údarás na Gaeltachta agus An Chomhairle Ealaíon, trí Ealaín na Gaeltachta, chun an togra seo a chur ar bun. 

Buíochas, freisin, le Uachtarlann Dhún na nGall as a gcuid urraíochta...beidh corn an chomhlachta á bhronnadh ar an mbuaiteoir, ar an oíche, chomh maith. 

Beidh mise ann, mar Bhean An Tí, agus táim ag súil go mór leis an oíche. Bígí linn, a chairde!

                           North West Words

Café Florence, Leitir Ceanainn  

An Déardaoin 30 Márta 2017 8.00pm

Comórtas filíochta Gaeilge 2016  

le Focail an Iarthuaiscirt, 

urraithe ag Ealaín na Gaeltachta 

agus Uachtarlann Dhún na nGall

An chéad duais: 250 euro agus corn (urraithe ag Uachtarlann  Dhún na nGall)

Moltóir an chomórtais:  Proinsias Mac a'Bhaird

Gearrliosta

An abairt ghearr - Sean O’Muireagáin, Béal Feirste

Bruach - Gearóid DeBriotún, Baile Átha Cliath

Admháil na hOíche Shathairn, Cúpla Lá Iardheireadh Caidrimh -

Dubhán Ó Longháin, Co. Dhún nan Gall

Gadaí na Geanmnaíochta - Michéal O Ruairc, Baile Átha Cliath

An Fidléir - Máire Dinny Wren, Co. Dhún nan Gall

Deasghnáth - Seosamh Ó Murchú, Baile Átha Cliath

Comórtas Filíochta

Féach thíos, mar eolas daoibh. Scéal le scaipeadh, a chairde, mura miste libh. 

Comórtas filíochta Gaeilge 2016

le Focail an Iarthuaiscirt,

urraithe ag Ealaín na Gaeltachta.

An chéad duais:€250 agus corn,

(urraithe ag Uachtarlann Dhún na nGall)

  

Bhéarfar cuireadh do na buaiteoirí ar fad a saothar a léamh ag oíche ealaíne a bheas ag Focail an Iarthuaiscirt i gCaifé Florence i Leitir Ceanainn.

Breis eolais ar an suíomh idirlíne: http://northwestwords.com/

Sprioc: 31ú Eanáir 2017

Táille: €5 do 3 dhán 

Fáilte roimh iarratais ar líne nó sa phost. Caithfidh na filí bheith os cionn 18 bliain d'aois agus gan a gcuid dánta bheith foilsithe roimhe seo. Tuilleadh eolais anseo (pdf). 

Crosfhocal

Crosfhocal na míosa le fáil anseo, a chairde. 

Ón méid atá léite agam anseo, is cosúil, ón mhí seo chugainn, go mbeidh 'Ré SAOL Thart' tar éis '30 éigin de bhlianta.' Is mór an trua é sin. 

Go raibh maith agaibh, a Choilm, bhain mé sult as bhur gcomhluadar, a chara. Aireoidh mé uaim bhur gcuideachta. 

Comórtas Filíochta

Comórtas nua ar an bhfód, a léitheoirí, ón Free Wee Library Project anseo i mBun Cranncha, agus tá an scéal le scaipeadh, mura miste libh, ar aon duine a mbeadh suim acu dán/dánta, i nGaeilge nó i mBéarla, a scríobh (páistí nó daoine fásta), le páirt a ghlacadh sa tionscadal iontach seo. 

Tá rialacha agus treoirlínte an chomórtais le léamh anseo (Béarla agus Gaeilge), agus tá tuilleadh eolais faoin Free Wee Library Project le léamh ar shuíomh Facebook an FWLP anseo, ón Derry Journal anseo, ón BBC News anseo, 

Is féidir éisteacht leis an méid atá le lá ag an scríbhneoir Frank Mc Guinness faoin Free Wee Library Project anseo, agus ar an gclár Nationwide ar RTÉ anseo (ag 8:00 ar an gclár). 

Spriocdháta taiscthe: 30 Bealtaine 2014. 

Comórtas Filíochta

an Free Wee Library

2014

Comórtas Filíochta do Dhaoine Fásta agus do Pháistí

Béarla agus Gaeilge

Bronnfar duaiseanna ar an 1ú agus an 2ú háit do dhánta i mBéarla, agus ar an 1ú agus an 2ú áit do dhánta i nGaeilge, sna catagóirí seo a leanas, 

Daoine Fásta:  

1ú Duais    €150 + 250 cóip den dán buacach, priontáilte mar ribín marcála, le dáileadh ar fud an FWLP.

                          

2ú Duais    €75 + 100 cóip den dán buacach,  priontáilte mar ribín marcála, le dáileadh ar fud an FWLP.

Páistí:

Os cionn 10:  

1ú Duais    €30 + 100 cóip den dán buacach, priontáilte mar ribín marcála, le dáileadh ar fud an FWLP.

2ú Duais    €15 +  dhá dhearbhán leabhar.

Faoi 10:        

1ú Duais    €20 + 100 cóip den dán buacach, priontáilte mar ribín marcála, le dáileadh ar fud an FWLP.

2ú Duais    €10 +  dhá dhearbhán leabhar. 

RTÉ Ag Glaoch Orm

Bhuel, a léitheoirí, bhí mé as baile le seachtain anuas, agus céard a bhí romham nuair a d'fhill mé inné, ar an ngléas freagartha anseo sa bhaile, ach teachtaireacht ó RTÉ! Níl a fhios agam cén chaoi ar éirigh leo greim a fháil ar m'uimhir bhaile, ach rinne mé píosa leo cheana, agus is dócha go bhfuil m'uimhir sa chóras áit éigin acu - fonn a dhéanfas fiach, seans. 

Pé scéal é, dar le hÚna, an bhean lenar labhair mé ar an bhfón, bean atá ag obair ar an gclár The Voice of Ireland, agus bean ag a raibh neart Gaeilge, bail óna Cé uirthi (cé nár chuala mé an sloinne sin s'aici, Seach, riamh roimhe), tá siad ag iarraidh go mbeadh ar a laghad amhrán amháin as Gaeilge ar an gclár, don bhabhta ceathrú ceannais, clár a bheas ar siúl i lár na míosa seo. 

Táim féin den bharúil gur bhain an lá úd, Dearg le Fearg, geit astu i RTÉ, agus chuile sheans nach bhfuil siad ag iarraidh fearg a chur ar an dream a bheas i mBéal Feirste ar an 12ú den mhí seo, ach oiread. 

Ar aon nós, baineadh geit nach beag asam féin, caithfidh mé a rá, a léitheoirí, nuair a luaigh sí go raibh siad ar an eolas faoi mar ar éirigh le m'amhrán nuachumtha i gcomórtas Ros na Rún/Raidió na Gaeltachta an bhliain seo caite, agus d'iarr sí orm an mbeinn sásta amhrán nua a scríobh don chlár The Voice, chomh luath agus is féidir, le go mbeadh deis ag na hiomaitheoirí an t-amhrán a chleachtadh in am, agus i gceart, don bhabhta ceathrú ceannais.  

Bhuel, bhreith mé ar an bhfaill, mar a thuigfeá, a léitheoir! Thapaigh mé mo dheis, agus dúirt mé léi go mbeadh amhrán i nGaeilge aici roimh dheireadh an lae. Agus, rinne mé amhlaidh. Ainm an amhráin? 

♫♪♫   Chreid an tAmadán Mé.   ♫♪♫ 

Bígí ag faire, a léitheoirí, agus bainigí sult as an lá. 

Féile Pan Cheilteach 2014

Mar a rinne mé anuraidh, is gearr go mbeidh mé ar an mbóthar arís chuig an bhFéile Pan Cheilteach i gCeatharlach, áit a mbeidh amhrán nuachumtha liom san iomaíocht arís i mbliana. 

Ní mise an t-aon bhlagálaí amháin a bheidh san iomaíocht i mbliana. I measc na n-iomaitheoirí uilig (19 amhrán) beidh an, ahem, striapach úd thall ar CeolBaile ann, chomh maith - ag súil go mór le bualadh leisean, caithfidh mé a rá, agus leis na hiomaitheoirí uilig, go deimhin. 

Tuilleadh eolais faoin bhFéile Náisiúnta Pan Cheilteach i gCeatharlach, an Satharn seo chugainn, 8ú Márta, agus faoin bhFéile Idirnáisiúnta Pan Cheilteach i nDoire, 22-27 Aibreán, le fáil anseo. 

Giota eolais faoi News acu ar an leathanach sin thuas, feictear dom, eolas faoi amhránaí nó dhó eile a bheidh san iomaíocht ar an oíche - John Spillane agus Eilín Ní Bheaglaíoch ar an ardán, freisin. Feicfidh mé ann sibh, a chairde!

Comórtas Amhránaíochta

Mar is eol daoibh, bhí mé páirteach sa chomórtas amhránaíochta, luaite ansin thuas, anuraidh, a léitheoirí, agus bhain mé an-sult as, caithfidh mé a rá. 

Ní dóigh liom go mbeidh amhrán réidh in am agam i mbliana, faraor, ach chuala mé go raibh Seán Bán ag labhairt faoin gcomórtas ar an gclár Iris Aniar ar Raidió na Gaeltachta ar maidin, agus chuir sé i gcuimhne dom go bhfuil spriocdháta na bliana seo ag teacht níos gaire, agus go mba chóir dom é sin a lua libh anseo, a chairde, ar fhaitíos amhrán réidh agaibh féin lena aghaidh, nach bhfuil seolta agaibh chucu fós. 

Mar sin, má tá amhrán réidh agat don Fhéile Pan-Cheilteach, b'fhiú go mór duit an t-alt seo le Cathal Póirtéir a léamh ar shuíomh writing.ie, áit a bhfaighidh sibh na sonraí uilig maidir leis an gcomórtas amhránaíochta. 

Beidh ort d'iarratas a sheoladh chuig Glór Cheatharlach, ar dhlúthdhiosca, roimh 5.00 i.n. ar an Aoine, 31 Eanáir, 2014, sé sin le rá, tá beagán os cionn coicíse fágtha a'd, más mian leat d'amhrán a chur san áireamh don chomórtas náisiúnta, a bheidh ar siúl ar 8 Márta, 2014, i gCeatharlach. 

Má éiríonn le d'amhrán sa chomórtas náisiúnta, beidh sé san iomaíocht sa chomórtas idirnáisiúnta a bheidh ar siúl i nDoire i mbliana, idir an 22-27 Aibreáin. Is féidir an clár, agus sonraí na gcomórtas uile, a fháil ag www.panceltic.ie.  

Comórtas Gearrscéalaíochta

Aiféala orm, a chairde, ach nílim ag scríobh mórán na laethanta seo - ba mhaith liom bheith ag scríobh, an dtuigeann sibh, ach níl deis agam, aimsir seo na gnóthachta, faraor géar. 

An méid sin ráite, níor mhaith liom go gcaillfeadh aon duine agaibh féin an deis bhur gcuid focal a chur i gcomórtas le focail dhaoine eile, mar sin tapaígí an deis, a scríbhneoirí, agus seolaigí bhur gcuid iarrachtaí chuig Comórtas Gearrscéalaíochta Uí Mháine roimh an 1 Feabhra 2014.

Na sonraí uilig le léamh anseo, freisin. Go n-éirí go geal libh! 

Féile Na Nollag

Le cúpla seachtain anuas, bhí Raidió na Gaeltachta, i gcomhar le lucht Ros na Rún, ar thóir amhráin - amhrán nuachumtha a bhí uatha, amhrán don Nollaig, mar a scríobh mé cheana. 

Bhí an comórtas amhránaíochta á reáchtáil acu le hairgead a bhailiú d'ionad nua Pieta House i dTuaim, ionad a bheidh ag oscailt go luath. 

Saoire sa Spáinn, agus €300, na duaiseanna a bhí le buachan, agus bhí deich n-amhrán san iomaíocht do na duaiseanna sin:

An Chéad Nollaig le Bairbre Ní Ghríofa, Sí an Nollaig Í le Feargal Ó Béarra, An Nollaig le Dara Ó Fatharta, An Nollaig Álainn Ó le Bairbre Uí Mhaolchiaráin, An Nollaig Mar Atá le Máirín Ní Dhomhnaill, Óiche Nollag i gConamara le Josie Mac Donncha, An Nollaig le Máirín Uí Fhlatharta, Oíche Nollag Mhór le Ellen Ní Chualáin, Nollaig le Pádraig Ó Maolaoidh, agus m'amhrán féin, Féile Na Nollag. 

Bhuel, le scéal gairid a dhéanamh de, seachas scéal an ghamhna bhuí, mar a déarfá, nach mé féin a bhain an comórtas, le m'amhrán Féile na Nollag, mar a fheicfidh sibh anseo. Clann Uí Mhaoileáin (Lorna, Laine, agus Eoghan, ón Aird Mhór/Bearna i gConamara) a chas an t-amhrán dom, agus is iad a bheidh á chasadh ag an gceolchoirm mhór i nGaillimh ar an 28 Samhain, áit a mbeidh lucht Ros na Rún agus Brian Kennedy i mbun siamsaíochta leo, ar mhaithe leis an gcarthanacht, Pieta House i dTuaim. Is féidir ticéid don cheolchoirm a cheannach i siopaí áitiúla, ar fud na Gaillimhe. 

Ba mhaith liom mo bhuíochas a ghabháil leis na moltóirí, Máire Pheter Uí Dhroighneáin (Ros na Rún), Fiachna Ó Braonáin (Hothouse Flowers) agus Colm Mac Séalaigh (Na Fíréin), agus leo siúd i Ros na Rún agus i Raidió na Gaeltachta, as an deis seo a thabhairt domsa, agus do Chlann Uí Mhaoileáin, bheith páirteach sa cheolchoirm iontach seo - maith sibh uilig! 

Feicfidh mé ann sibh, a chairde.

Amhrán Don Nollaig

Más rud go bhfuil amhrán nuachumtha scríofa agat, nó fonn ort ceann nua a chumadh, ceann a d'fheilfeadh mar amhrán don Nollaig, a léitheoir, tá deich lá eile fágtha agat le d'amhrán a chuir san áireamh don chomórtas atá á reáchtáil ar chlár Mháirtín Tom Sheáinín, Ardtráthnóna, ar Raidió na Gaeltachta, i gcomhar le lucht Ros na Rún, faoi láthair.

Tá na sonraí uilig le fáil anseo, áit a gcloisfidh sibh Cóilín Ó Scolaí, Maria Ní Ghríofa, Seán Ó hÉanaigh srl., ag labhairt faoin gceolchoirm (13.40) atá á reáchtáil acu don ionad nua, Pieta House i dTuaim, ionad a bheidh ag oscailt go luath. 

Cloisfear na sonraí faoin gcomórtas don amhrán nuachumtha (20.30) ansin, freisin, amhrán a bheidh le cloisteáil ag an gceolchoirm i gCathair na Gaillimhe ar an 28 Samhain, áit a mbeidh na haisteoirí agus foireann Ros na Rún i láthair, ag tacú leis an gcarthanacht iontach seo.

Más mian leat bheith páirteach, b'fhiú go mór duit peann a chur le pár, nó méar(a) a chur le méarchlár, agus d'amhrán a chumadh anois, agus a sheoladh, ar dhlúthdhíosca, chuig Máirtín ar Ardtráthnóna roimh an 28 Deireadh Fómhair, más féidir.  

Ar scáth a chéile...

Crosfhocal, Comórtais agus Comhghairdeas

Crosfhocal na Míosa le fáil anseo, a léitheoirí, agus, mar a scríobh mé cheana, bíonn neart eile le léamh ar shuíomh gréasáin Saol na Gaeilge, más mian libh bualadh isteach ann. 

An gcuireann sé iontas ar bith orm an fear uasal sin, Proinsias Mac A'Bhaird, a fheiceáil ar leathanach na bpríomhscéalta ar an suíomh sin - ní chuireann! Chroch sé leis 4 cinn de na duaiseanna ag Comórtais Liteartha an Oireachtais 2013, áit a mbronntar na gradaim is mó le rá ar scríbhneoirí na Gaeilge. Comhghairdeachas ó chroí leis na buaiteoirí uilig agus, go deimhin, comghairdeachas leis na daoine sin uilig ar ar bronnadh duaiseanna liteartha an Oireachtais le 116 bliain anuas. 

Ó tharla mé ag caint ar an ábhar seo .i. buaiteoirí, ba mhaith liom mo chomhghairdeachas a roinnt leo siúd a bhuaigh na duaiseanna sa Chomórtas Grianghrafadóireachta, Is Álainn Í An Ghaeltacht, comórtas a bhí á reáchtáil ag Údarás na Gaeltachta, mar a scríobh mé roimhe seo. Cé go raibh grianghraif agam féin sa chomórtas nár bhain aon duais, bhain mé an-sult as an gcraic uilig, agus tá súil agam go mbeidh an comórtas ar siúl arís, am éigin amach anseo.

Sula ndéanfaidh mé dearmad, a léitheoirí, daoibhse le suim agaibh sa léirmheastóireacht - go háirithe sibhse a mbeadh spéis agaibh bheith in bhur gcriticeoirí ealaíne - tá Comórtas Scríbhneoireachta á reáchtáil ar an mblag Nua-Ealaín. Tá agaibh go dtí an 24/11/2013 le bhur léirmheas, 400 focal ar a mhéid, a sheoladh chucu,'...ar aon taispeántas comhaimseartha ealaíne, ar siúl in Éirinn idir seo agus 24ú Samhain.' - na sonraí uilig le léamh anseo, a chairde.  

Gearrliosta na Gaeltachta Áille

Cúpla lá ó shin, fuair mé ríomhphost ó Údarás na Gaeltachta, ríomhphost inar insíodh dom gur roghnaíodh grianghraf liom do chomórtas a luaigh mé libh cheana, a léitheoirí, agus go bhfuil sé ar an ngearrliosta don chomórtas, Is Álainn Í An Ghaeltacht; mar aon le 14 ghrianghraf eile. 

Isteach liom ar shuíomh an Údaráis, go bhfeicfinn cén ceann a roghnaíodh (chuir mé trí cinn chucu) agus go bhfeicfinn na 14 ghrianghraf eile atá san iomaíocht liom. Bhí sé ar cheann de na coinníollacha acu nach raibh an comórtas oscailte do ghrianghrafadóirí proifisiúnta, agus caithfidh mé a rá go bhfuil jab thar barr déanta ag na haimitéaraigh uilig, agus go bhfuilim ríméadach gur éirigh liom bheith ina gcuideachta. Maith sibh uilig, a chomhaimitéaraigh! 

Fágfaidh mé fúibh féin é bhur dtuairim a roinnt leis an Údarás maidir leis na grianghraif éagsúla, agus is féidir libh bhur dtacaíocht a thabhairt don chomórtas, agus vóta a chaitheamh do bhur rogha féin, trí 'Like' a bhrú ar an gceann is fearr libh, ar leathanach Facebook an Údaráis, áit a bhfeicfidh sibh na 15 ghrianghraf seo, atá ar an ngearrliosta.  

Caithfear bheith cláraithe le Facebook le do vóta a chaitheamh, agus an vóta sin a chaitheamh ar shuíomh an Údaráis amháin, áit a bhfeicfidh sibh cé a thóg an grianghraf, cár tógadh é, teideal an ghrianghraif srl. 

Beidh 50% de na marcanna ag brath ar vótaí ón bpobal, agus an 50% ag teacht ó phainéal moltóirí. Tá os cionn seachtain eile fágtha agaibh, a léitheoirí - ní ghlacfar le vótaí théis 5i.n, Dé Máirt, 10 Meán Fómhair. 

Nuair a thaispeáin mé mo phictiúr féin d'fhear ar m'aithne, agus dúirt leis go raibh mé ar an ngearrliosta ag na moltóirí, séard, ahem, a dúirt sé liom ná, 

'I guess they know a good ass when they see one!'

Tá na pictiúir uilig le feiceáil anseo. Bainigí sult as an gcraic, a chairde na Gaeltachta agus na grianghrafadóireachta, agus caithigí vóta roimh an 10ú, más féidir. 

Tic Tic, Clic Clic...

Spriocdhátaí na gcomórtas ag teacht níos gaire, a léitheoirí!

Tá trí lá eile agaibh le bhur ngrianghraif a sheoladh chuig an iris Nós, más rud go bhfuil ticéid ag teastáil uaibh le haghaidh an Electric Picnic. 

Agus, tá sé lá eile agaibh le bhur ngrianghraif a sheoladh chuig Údarás na Gaeltachta, más rud go gceapann sibh gur álainn í an Ghaeltacht!

Clic, clic, tic, tic...

Comórtais Ghrianghrafadóireachta

Sea, bhí mé ar bharr na Cruaiche, a chairde, agus thug mé créacht nó dhó abhaile liom, (mo dhroim bocht...mo chosa bochta...mo lámha bochta!) ach thug mé grianghraf nó dhó abhaile liom, freisin, mar atá le feiceáil agaibh thuas.

Tá an comórtas grianghrafadóireachta don iris Nós luaite agam libh cheana - comórtas le haghaidh dhá thicéad don fhéile cheoil Electric Picnic 2013 - agus tá súil agam go dtiocfaidh libh bhur n-áit ar leith féin a aimsiú, le bhur Nós a léamh, roimh an 16 Lúnasa, a léitheoirí, mar sin é an spriocdháta d'iarratais atá leagtha síos ag na heagraithe don ghrianghraf ar leith sin.

Tá comórtas grianghrafadóireachta eile á reáchtáil ag Údarás na Gaeltachta - 'Is álainn í an Ghaeltacht' - é mar aidhm acu an Ghaeltacht 'a chur chun cinn mar áit álainn le cónaí, le hoibriú, le dul ar saoire agus le gnó a dhéanamh ann.' Tá agaibh go dtí an 19 Lúnasa le bhur ngrianghraif, a léiríonn saol na Gaeltachta, a sheoladh chucu. Tuilleadh eolais le fáil anseo. 

Bígí ag cliceáil! Agus, go n-éirí go geal libh, a léitheoirí.  

Nósanna na mBlagálaithe

Bhuel, an bhfuil sé déanta agaibh fós, a léitheoirí? 

An bhfuil bhur ngrianghraf tógtha agaibh, agus seolta agaibh chuig an dream thall i Nós, don chomórtas atá a reáchtáil acu? Níl le déanamh agaibh ach 'grianghraf suimiúil a ghlacadh díbh féin agus sibh ag léamh NÓS in áit ar leith' - simplí, nach bhfuil! 

An n-aithníonn sibh aon duine sa ghrianghraf thuas, grianghraf a tógadh taobh amuigh d'fhoirgneamh Oideas Gael, i nGleann Cholm Cille, aréir? 

Sea, sin, ahem, Mise Áine ar chlé, Karen (Íomhá an Lae) i lár báire, agus Réaltán (Turas Ailse) ar dheis; Mike (Cainteoir Doofus) a bhí taobh thiar den cheamara - blagálaithe muid uilig, ag baint suilt as an gcraic agus as an aimsir álainn i nGleann Cholm Cille inné. 

Agus, bhíomar ag léamh Nós, ar ndóigh! 

Cá mbeidh tusa ag léamh do cheannsa, a léitheoir? 

Tá agat go dtí an 16 Lúnasa le d'iarracht a sheoladh chucu thall i Nós, ag comortas@nosmag.com; nó do ghrianghraf a chur chucu ar Twitter, nó a chur ar an leathanach Facebook atá acu, mar a rinne mise. 

Tuilleadh eolais faoin gcomórtas le fáil anseo. 

Cá bhfuil An Grá?

B’fhéidir go bhfaighidh sibh an freagra anseo, a léitheoirí.

Ach, más rud go bhfuil freagra agat féin, nó go bhfuil dán agat -  ach é i’d smaointe féin, ag fanacht le saoirse, abair - agus más rud gur mhaith leat an smaoineamh sin a roinnt le daoine, b’fhéidir gurbh fhiú duit breathnú ar an gcomórtas seo, The Irish Poem Is...'

Bheinn féin den tuairim go mbeadh mo cheannsa i nGaeilge, ach sin mise. Tuilleadh dánta, agus físeanna, ón Poetry Project iontach, le feiceáil anseo.